உலகமே வியந்த சூப்பர் ஹீரோ கதைகள்!

ஹாலிவுட் சினிமா பிரியர்களில் ஒரு தரப்பினர் சூப்பர் ஹீரோ கதைகளின் விரும்பிகள்.  ஆக்ஷன், காமெடி, டிராமா, அனிமேஷன் என ஹாலிவுட்டில் கலந்துகட்டி படங்கள் வெளிவந்து கொண்டிருக்கையில், இந்த வகை படங்களுக்கு உலகம் முழுக்க ரசிகர்கள் விரவி கிடக்கிறார்கள். திரையரங்குகள் இல்லாத இந்த கரோனா பொது முடக்கத்தில் வீட்டுக்குள் சினிமா வந்திருக்கிறது. சூப்பர் ஹீரோ கதை விரும்பிகள் எந்த படங்களை பார்க்கலாம். இதோ, எதிர்பார்ப்பை எகிற வைக்கும் படங்களின் பட்டியல்....

அவெஞ்சர்ஸ் 4

மார்வெல்லின் முக்கியமான படைப்பு "அவெஞ்சர்ஸ்.' இதுவரை மூன்று பாகங்கள் வெளிவந்திருக்கும் நிலையில், இது நான்காம் பாகம். "கட்டப்பா ஏன் பாகுபலியைக் கொன்றார்' என்பதுபோல், இந்தப் படம் வெளிவந்த போது முக்கியக் கேள்வி, "தானோஸ் மற்ற சூப்பர் ஹீரோக்களை என்ன செய்தார்' என்பதுதான். அதற்கான விடையையும் தீர்வையும் சொல்கிறது அவெஞ்சர்ஸின் நான்காம் பாகமான "எண்ட்கேம்'. "அயர்ன் மேனி'ல் ஆரம்பித்து, "கேப்டன் அமெரிக்கா', "தோர்', "ஹல்க்', "ஸ்பைடர்மேன்', "ப்ளாக் பேந்தர்', "டாக்டர் ஸ்ட்ரேன்ஜ்' என மார்வெல்லின் முக்கிய சூப்பர் ஹீரோக்கள் அனைவரும் இந்தப் படத்தில் நடித்திருக்கிறார்கள். "இன்ஃபினிட்டி வார்' பாகத்தை இயக்கிய அந்தோனி ரூúஸா மற்றும் ஜோ ரூúஸா இந்தப் படத்தை இயக்கியிருக்கிறார்கள்.

கேப்டன் மார்வெல்

உலகம் முழுக்கவுள்ள சூப்பர் ஹீரோ பிரியர்கள் எதிர்பார்த்துக் காத்திருந்த படம் "கேப்டன் மார்வெல்'.  பெண் சூப்பர் ஹீரோவின் முதல் படம். "அவெஞ்சர்ஸ்'  "இன்ஃபினிட்டி வார்' படத்தில் பாதி உலகம் அழிந்துவிட்டது. இன்ஃபினிட்டி வாரின் இறுதியில் கேப்டன் மார்வெல்லை நிக் ஃப்யூரி உதவிக்கு அழைப்பதுபோல காட்சி அமைந்திருக்கும். உலகை மீட்க வரப்போகும் கேப்டன் மார்வெல்லின் முன்கதை இது. இரண்டு ஏலியன் இனங்கள் பூமியில் சண்டையிடத் தொடங்க, அதன் நடுவே மாட்டிக்கொண்ட கேரோல் டேன்வர்ஸ், தான் யார் என்பதை உணர்கிறாள். காமிக்ஸ் ரசிகர்களைக் குஷிப்படுத்தும் வகையில் இதன் தயாரிப்பு இருந்தது.  அதீத சக்தி படைத்த கேப்டன் மார்வெல் ஓர் அணு உலைக்குச் சமம் என்பது காமிக்ஸ் ரசிகர்களுக்கு முன்னமே தெரிந்திருக்கும். "ரூம்' படத்துக்காக ஆஸ்கர் விருது வென்ற ப்ரீ லார்சன், கேப்டன் மார்வெல்லாக மிரட்டி இருந்தார்.  

"ஒன்ஸ் அப்பான் ஏ டைம்' 

இன் ஹாலிவுட்கடந்த 30 ஆண்டுகளில் சினிமாவை நேசிக்கும் அனைவருக்கும் பிரியமான ஒரு பெயர் என்றால், அது அமெரிக்க இயக்குநர் குவென்டின் டொரன்டினாவின் பெயர்தான். ஆனால், 10 படங்களோடு தன் திரையுலக வாழ்வுக்கு குட்பை சொல்வதாக அறிவித்திருக்கிறார் இந்த மனிதர்.

அதில் இது ஒன்பதாவது படம். "ஜாங்கோ அன்செய்னடு' படத்தின் டிகாப்ரியோ, இன்குளோரியஸ் பாஸ்டர்ட்ஸ் படத்தின் பிராட் பிட் இருவரும்தான் இந்தப் படத்தின் ஹீரோக்கள்.

1960-களில் மேன்சன் ஃபேமிலி என்னும் கல்ட் குழு பிரபல இயக்குநர் ரோமன் பொலன்ஸ்கியின்  மனைவி ஷாரோன் டேட் மற்றும் சில பிரபலங்களை கொடூரமாகக் கொல்கின்றனர். படத்தில் டிவி நடிகராக டிகாப்ரியோவும் அவரது ஸ்டண்ட் டூப்பராக பிராட் பிட்டும் நடித்தார்கள். மறைந்த நடிகை ஷாரோன் டேட்டாக மார்கட் ராபி நடித்துள்ளார். 

ஜான் விக் 3

மனதுக்குப் பிடித்த காரையும், தனக்கு நெருக்கமான நாயையும் அழித்ததால் பிறந்தவன்தான் இந்த ஜான் விக். "மேட்ரிக்ஸ்' படப் புகழான கீனு ரீவ்ஸ்தான் இந்தப் படத்தின் கதாநாயகன். மனைவியை இழந்த பின் வெளியுலகத்தில் தலைகாட்டாமல் வாழ்ந்து வரும் தாதாவை வம்புக்கு இழுக்கிறார் ஒரு பெரிய இடத்து வாரிசு.

அவரைப் பழி தீர்த்ததும் இவரைப் பின் தொடர்கிறது பல மாஃபியா கும்பல். எதிர்த்து வரும் அனைவரையும் எதிர்கொள்ளும் ஜான் விக் செல்லும் பாதை, துப்பாக்கியும் ரத்தமுமாகப் படர்ந்திருக்கிறது. படத்தை எங்கு எடுத்துப் பார்த்தாலும் வன்முறை உச்சம் தொட்டிருக்கும். இந்தப் படம் வெளியான போது பெரும் எதிர்பார்ப்பு நிலவியது. 

ஜோம்பிலேண்ட் : டபுள் டேப்

இந்தப் படத்தின் முதல் பாகம் 2009-ஆம் ஆண்டு வெளியானது. ஜோம்பிக்களை வைத்து அதிர்வாக  மட்டும் எடுக்காமல் கதையையும் திரைக்கதையும் படு காமெடியாக நகர்த்தியிருப்பார் இயக்குநர் ரூபென் ஃப்லெயிச்சர். அதுதான் இந்தப் படத்தின் சிறப்பு. வூடி ஹாரல்சன், ஜெஸ்ஸி ஈசன்பெர்க், எம்மா ஸ்டோன் போன்ற முன்னணி நடிகர்கள் இந்தப் படத்தில் நடித்திருப்பார்கள். அதே இயக்குநர், அதே நடிகர்கள் என இவர்களது கூட்டணி அடுத்தடுத்து இணைந்து கொண்டே இருக்கிறது. 

ஸ்பைடர்மேன்

மார்வெல்லின் மற்றுமொரு படைப்பு" ஸ்பைடர்மேன்.' ஒவ்வொரு சூப்பர் ஹீரோக்களுக்கும் ஒவ்வொரு பின்புலக் கதை இருக்கும். அவர்கள் எல்லாம் சங்கமிக்கும் இடம் "அவெஞ்சர்ஸ்.' இதுதான் "மார்வெல்'லின் பாணி. இந்த வரிசையில், ஸ்பைடர்மேனை அவெஞ்சர்ஸின் கதைக்குள் புகுத்துவதற்காக அந்தக் கதாபாத்திரத்தை மீண்டும் அறிமுகப்படுத்தியுள்ளது மார்வெல். மறைந்த காமிக்ஸ் சூப்பர் ஸ்டார் ஸ்டேன்லிக்கு மிகவும் பிடித்த ஸ்பைடர்மேன் ஹீரோ டாம் ஹோலண்டுதான். ஏனெனில், ஸ்பைடர்மேன் ஹோம்கம்மிங்கில் வரும் டாம் ஹோலாண்டின் வயதுக் கதாபாத்திரத்தைத்தான் ஸ்டேன் லீ மனதில் வைத்து ஸ்பைடர்மேனை உருவாக்கினார்.