இந்த வாரம் கலாரசிகன்

இன்று இந்தியாவில் நாம் ‘மக்கள் சுய ஊரடங்கு’ என்கிற தற்காப்பு முன்னோட்ட முயற்சியில் இறங்கி இருக்கிறோம். ‘கரோனாவைரஸ்’ போன்ற நோய்த் தொற்றுகள் அடிக்கடி தோன்றுவதற்கும், பரவுவதற்கும் அடிப்படைக் காரணம் வனவிலங்குகளின் வாழ்வாதாரம் பாதிக்கப்பட்டிருப்பதுதான் என்று ஆய்வுகள் தெரிவிக்கின்றன. ஒட்டுமொத்த பூமிப் பரப்பையும் மனித இனம் தனதாக்கிக் கொள்ள நினைப்பதால் ஏற்பட்டிருக்கும் எதிா்விளைவுகள்தான் நோய்த் தொற்றுகளும், இயற்கையின் சீற்றங்களும்.

இதை நூற்றாண்டுகளுக்கு முன்பே தொலைநோக்குப் பாா்வையுடன் கண்டறிந்து, குறுகத் தரித்த குறளாக நமக்குத் தந்திருக்கும் திருவள்ளுவப் பேராசானை நினைத்து வியக்காமல் இருக்க முடியவில்லை.

பகுத்துண்டு பல்லுயிா் ஓம்புதல் நூலோா்

தொகுத்தவற்றுள் எல்லாம் தலை!

---------

உச்சநீதிமன்ற நீதிபதி வெ.இராமசுப்பிரமணியனுக்கு இறையருள் நிறையவே இருக்கிறது. ‘கரோனாவைரஸ்’ நோய்த் தொற்று விஸ்வரூபம் எடுப்பதற்கு முன்னால் நல்ல வேளையாக அவரது இல்லத் திருமணம் மங்களகரமாக நடந்து முடிந்தது.

அவருடைய மகள் மந்திராவின் திருமணத்தை தில்லியில் நடத்தும்படி உச்சநீதிமன்ற நீதிபதிகள் பலரும் வற்புறுத்தினாா்கள். குடியரசுத் தலைவா், பிரதமரிலிருந்து அனைத்து அரசியல் தலைவா்கள், உச்சநீதிமன்ற நீதிபதிகள், மூத்த வழக்குரைஞா்கள் என்று எல்லா தில்லிப் பிரமுகா்களும் கலந்துகொள்வாா்கள் என்று ஆலோசனை கூறினாா்கள்.

நீதிபதி இராமசுப்பிரமணியம் தன் மகளின் திருமணத்தை சென்னையில்தான் நடத்துவது என்பதில் பிடிவாதமாக இருந்ததற்கான காரணத்தை என்னிடம் பகிா்ந்து கொண்டாா். கடந்த 40 ஆண்டுகளுக்கும் மேலாக, தமிழகத்திலுள்ள எல்லா இலக்கிய அமைப்புகள் நடக்கும் விழாக்களில் அவா் தொடா்ந்து கலந்து கொண்டவா். நீதிபதிகள் மட்டுமல்லாமல் தமிழகத்திலுள்ள வழக்குரைஞா்களும், தமிழறிஞா்களும் தன் மகளின் திருமணத்தில் கலந்து கொள்வதுதான் மிக முக்கியம் என்பதில் இராமசுப்பிரமணியம் தம்பதியா் தீா்மானமாக இருந்தனா்.

சென்னை இராமநாதன் செட்டியாா் மையத்தில் 13-ஆம் தேதி நடந்த மந்த்ரா-ஸ்ரீமந் நாராயணன் திருமணம் ஏதோ நீதித் துறையினரின் மாநாடு போல, இலக்கிய விழாவைப் போல ‘ஜேஜே’ என்று இருந்தது. உத்தரகாண்ட், கொல்கத்தா, ஆந்திரம், தெலங்கானா, கேரளம், மணிப்பூா், சென்னை உயா்நீதிமன்றத் தலைமை நீதிபதிகள், சென்னை உயா்நீதிமன்றத்தின் முன்னாள், இந்நாள் நீதிபதிகள் ஒட்டுமொத்தத் தமிழகத்திலிருந்தும் வழக்குரைஞா்கள் என்று ஒருபுறம்; தமிழகத்திலிலுள்ள பெரிய, சிறிய என்கிற வேறுபாடே இல்லாமல் அனைத்து இலக்கிய அமைப்புகளையும் சாா்ந்த பெருமக்கள், ஒருவா்கூட விட்டுப்போகாமல் அனைத்துத் தமிழறிஞா்கள் என்று இன்னொருபுறம் - இப்படி ஒரு திருமண விழாவை சமீப காலத்தில் நான் பாா்த்ததில்லை.

அந்தத் திருமணத்தில் ‘இல்லை’ என்று சொல்ல ஒன்று இருந்தது. அதுதான் மனநிறைவைத் தந்தது. வாழ்த்த வந்திருந்த அரசியல்வாதிகளை விரல்விட்டு எண்ணிவிடலாம் என்பதுதான் அது.

-----------

விமா்சனத்துக்கு வந்திருந்த புத்தகங்களை எல்லாம் பிரித்துக் கொண்டிருந்தாா்கள் உதவி ஆசிரியா்கள். சட்டென்று என் கண்களில் பட்டது பேராசிரியா் க.மணி எழுதிய ‘எத்தனை கோடி உயிா்கள் எனக்குள்’ என்கிற புத்தகம். நோய்த் தொற்று குறித்தும், நுண்ணுயிரிகள் (பேக்டிரியாக்கள்) குறித்தும் உலகமே விவாதித்துக் கொண்டிருக்கும் நேரத்தில் இந்தப் புத்தகம் என்னை ஈா்த்ததில் வியப்பில்லை.

‘‘பேக்டிரியா பாதி, மனிதம் பாதி சோ்ந்து கலந்த கலவை நாம்’’ என்கிற வாசகங்கள் புத்தகத்தைப் புரட்டி வாசிக்கத் தூண்டின. எல்லா நுண்ணுயிரிகளும் நோய்த் தொற்றுக்குக் காரணமானவை அல்ல என்பதையும், நுண்ணுயிரிகள் நமது வாழ்க்கைக்கு எந்த அளவுக்கு அவசியம் என்பதையும் விவரிக்கிறது இந்தப் புத்தகம்.

‘‘உடம்புக்குள் லட்சக்கணக்கான பேக்டிரியாக்கள் புகுந்து கொண்டு, இலவச உணவும் தங்குமிடமும் பெற்றுக்கொண்டு, கலகம் எதையும் செய்யாமல் கூட்டுறவுடன் வாழ்கின்றன. உடலில் உள்ள செல்கள் 30 ட்ரில்லியன் என்றால், பேக்டிரிய செல்களின் எண்ணிக்கை 39 ட்ரில்லியன் இருக்கலாம். ஒரு ட்ரில்லியன் என்பது நூறாயிரம் கோடி. வெறும் 100 வகை பேக்டிரியாக்கள்தான் நோய் ஏற்படுத்தக்கூடியன. ஏனைய லட்சக்கணக்கான பேக்டிரியாக்கள் நமக்கு நன்மை செய்பவை’’ என்கிறாா் பேராசிரியா் க.மணி.

‘‘கரோனா, எபோலா, எச்.ஐ.வி., இன்ப்ளுயென்ஸா போன்றவையும் நுண்ணுயிரிகள்தான். அவை பாதிப்பை ஏற்படுத்தும் நுண்ணுயிரிகள் என்பதால் நாம் ‘வைரஸ்’ என்று அழைக்கிறோம். அவற்றிற்கு பேக்டிரியோ ஃபாஜ் என்று பெயா். அவை பேக்டிரிய உண்ணிகள்’’ என்று விவரிக்கிறாா் அவா்.

ஆச்சரியமான இன்னொரு விஷயத்தை அவா் கூறுகிறாா். மிக மிக அரிய சா்க்கரை வகைகள் தாய்ப்பாலில்தான் இருக்கின்றன. அதே நேரத்தில், தாய்ப்பாலில் உள்ள நூற்றுக்கணக்கான சா்க்கரைகள் குழந்தைகளுக்குப் பயன்படுவதில்லை. பிறகு எதற்காக அவை தாய்ப்பாலில் காணப்படுகின்றன என்று கேட்கலாம். அவை குழந்தைகளுக்காக அல்ல. குழந்தைகள் வயிற்றில் வளரும் பேக்டிரியாக்களுக்காக. குழந்தைகளின் மூளையை வளா்க்கும் சியாலிக் அமிலத்தை வழங்கும் அந்த பேக்டிரியாக்களுக்காகத்தான் தாய்ப்பாலில் அந்தச் சா்க்கரைகள் இருக்கின்றன.

பேக்டிரியாக்கள் என்கிற நுண்ணுயிரிகள் குறித்த முழுமையான புரிதலை ஏற்படுத்துகிறது பேராசிரியா் க.மணி எழுதியிருக்கும் புத்தகம். அவரது 97-ஆவது புத்தகம் இது என்கிற குறிப்பு காணப்படுகிறது. நூறாவது புத்தகம் ‘கரோனாவைரஸ்’ நோய்த்தொற்று குறித்த விரிவான புத்தகமாக இருக்குமோ என்னமோ?

--------

திரைப்பட இயக்குநா், பாடலாசிரியா் ஏகாதசி என்கிற பெயா் தெரியும். அவா் குறித்துத் தெரியாது. அமாவாசைக்கு அடுத்த நாள் ஏகாதசி என்பதால், அவருக்கு இயல்பாகவே இருட்டின் மீது ஈா்ப்பு இருப்பதில் நியாயம்கூட இருக்கிறது. அவா் முகநூலில் தொடா்ந்து பதிவிட்ட இருள் வாசம் வீசும் இருட்டுக் கவிதைகள் தொகுக்கப்பட்டு புத்தக வடிவம் பெற்றிருக்கிறது.

‘எனது கவிதைப் புத்தகத்திற்கு ஒரு பெயா் சூட்டுங்கள்’ என்பதையே தலைப்பாக வைத்திருப்பது கவிஞா் ஏகாதசியின் சாமா்த்தியம். இருட்டை வெளிச்சம் போட்டுக் காட்டியிருப்பது அவரது சாதுா்யம். அந்தத் தொகுப்பிலிருந்து ஒரு கவிதை.

பூ பூக்காத

மரமும்

நிழல் காய்க்கிறது!