வியாபாரத்தை விருத்தியாக்கும் வீரனார்!

திருவாரூர் மாவட்டம், மன்னார்குடி வட்டத்தில் உள்ள சித்தமல்லி கிராமம் பல வகையிலும் சிறப்பு வாய்ந்தது. இத்தலத்தில் சித்தர்கள் தவமிருந்து இறைவனை அடையும் பேறு பெற்றதால் சித்தர்மல்லி  என்ற பெயர் ஏற்பட்டது. இதுவே காலப்போக்கில் மருவி சித்தமல்லி என்று அழைக்கப்படுகிறது. மேலும் இங்கே ஜபம் செய்பவர்களின் பலன் ஒன்றுக்கு நூறு மடங்கு சித்திக்கும் என்ற காரணத்தாலும்  சித்தமல்லி என்று அழைக்கப்படுகிறது.

இக்கிராமத்தில் அபிராமி அம்பாள் சமேத குலசேகர ஸ்வாமி ஈஸ்வரன் ஆலயமும், கல்யாண வெங்கடேசப் பெருமாள் ஆலயமும் அழகுற அமைந்துள்ளன. இங்கே காஞ்சி மகாசுவாமிகளுக்கு கல்வி  போதித்த குருவிற்கு அதிஷ்டானம் உள்ளது. இத்தகைய சிறப்பு வாய்ந்த இவ்வூரின் காவல் தெய்வமாக அருள் பாலித்து வருகிறார் ஸ்ரீஆகாச வீரனார். இவரை வழிபட்டால் தீராத வியாதியும் தீரும்,  வியாபாரம் செழிக்கும் என்பது பக்தர்களின் நம்பிக்கை.

ஸ்ரீஆகாச வீரனாருக்கு பழங்காலத்திலிருந்து தீபத்தின் மூலமே வழிபாடு நடைபெறுகிறது. கதை மற்றும் அரிவாள், சந்நிதியில் வைக்கப்பட்டு அவற்றுக்கு படையல் போடுவது மரபு. சந்நிதிக்கு எதிரில்  ஆகாச வீரனாரின் குதிரை கம்பீரமாக வீற்றிருக்கிறது. தற்போது ஸ்ரீஆகாச வீரனாருக்கு உருவச் சிலை அமைக்கப்பட்டு புதிதாக ஆலயம் நிர்மாணிக்கும் பணி நடந்துகொண்டிருக்கிறது. பரிவார  தெய்வங்களுக்கு ஆலயம் அமைக்கும் பணியும் நடைபெறுகிறது. மேலும் வலம்புரி விநாயகருக்கும், பாலமுருகனுக்கும் புதிய சந்நிதிகள் அமைய உள்ளன. தற்போது திருப்பணிகள் மீதமுள்ள நிலையில்  வருகிற 29 ஆம் தேதி ஆகாச வீரனார் ஆலய கும்பாபிஷேகம் நடைபெற உள்ளது. 27ஆம் தேதி யாக சாலை பூஜைகள் தொடங்குகின்றன.

தகவலுக்கு 94441 01502