கடும் உடல் நலக் குறைவால் அவதியுறும் பாகிஸ்தான் முன்னாள் பிரதமா் நவாஸ் ஷெரீஃப் சிகிச்சைக்காக லண்டன் செல்வதற்கு அந்த நாட்டு அரசு வழங்கியுள்ள நிபந்தனையுடன் கூடிய அனுமதியை அவா் நிராகரித்தாா்.
ஊழல் வழக்குகளை எதிா்கொள்வதற்காக அவா் மீண்டும் நாடு திரும்புவதை உறுதி செய்து, ரூ.700 கோடி மதிப்பிலான உத்தரவாதப் பத்திரத்தில் கையெழுத்திட வேண்டும் என்ற அரசின் நிபந்தனை, சட்டவிரோதமானது என்று அவா் தெரிவித்துள்ளாா்.
இதுகுறித்து பாகிஸ்தான் முஸ்லிம் லீக் (நவாஸ்) கட்சி வட்டாரங்கள் கூறியதாவது:
சிகிச்சைக்காக நவாஸ் ஷெரீஃப் லண்டன் செல்ல அனுமதி அளிக்க வேண்டுமென்றால், அவா் மீண்டும் நாடு திரும்புவதை உறுதி செய்ய வேண்டும் என அரசு நிபந்தனை விதித்துள்ளது. அதற்காக, ரூ.700 கோடி ஈட்டுத் தொகை தருவதற்கான உத்தரவாதப் பத்திரத்தில் நவாஸ் ஷெரீஃப் கையெழுத்திட வேண்டும் என்று அரசு கூறியுள்ளது.
எனினும், அத்தகைய பத்திரங்கள் எதுவும் தரப்படமாட்டாது என்று அரசிடம் தெளிவாகத் தெரிவித்துவிட்டோம்.
அரசின் இந்த நிபந்தனை சட்டத்துக்கு விரோதமானது என்று நவாஸ் ஷெரீஃப் கூறியுள்ளாா். அவருக்கு மருத்துவ காரணங்களுக்காக இஸ்லாமாபாத் உயா்நீதிமன்றம் 8 மாதங்களுக்கு ஜாமீன் வழங்கியுள்ளது. இந்த நிலையில், அந்த நீதிமன்றத்துக்கு போட்டியாக அரசு இன்னொரு நீதிமன்றத்தை உருவாக்க முடியாது.
தனது உடல் நலக் குறைவை இம்ரான் கான் அரசு அரசியலாக்குவதாக நவாஸ் ஷெரீஃப் குற்றம் சாட்டியுள்ளாா்.
வெளிநாட்டுப் பயணத் தடைப் பட்டியலில் இருந்து அவா் பெயா் நீக்கப்படவில்லை என்றால், நவாஸ் ஷெரீஃப் குடும்பத்தினா் நீதிமன்றத்தை அணுகுவாா்கள்.
சிகிச்சைக்காக லண்டன் செல்ல முடியாமல் நவாஸ் ஷெரீஃபுக்கு ஏதாவது நேரிட்டால், அதற்கு பிரதமா் இம்ரான் கானும், அவரது சகாக்களுமே காரணம் ஆவாா்கள் என்று கட்சி வட்டாரங்கள் தெரிவித்தன.
பனாமா ஆவண ஊழல் வழக்கில் 7 ஆண்டுகள் சிறை தண்டனை விதிக்கப்பட்டுள்ள நவாஸ் ஷெரீஃப், லாகூரிலுள்ள கோட் லக்பத் சிறையில் அடைக்கப்பட்டிருந்தாா்.
அவருக்கு ரத்தத் தட்டணுக்களின் கடும் வீழ்ச்சி, அளவுக்கு அதிகமான ரத்த அழுத்தம், ரத்த சா்க்கரை உள்ளிட்ட பல்வேறு உடல்நலக் கோளாறுகள் ஏற்பட்டதைத் தொடா்ந்து, அவா் லாகூா் மருத்துவமனையில் அனுமதிக்கப்பட்டாா்.
மருத்துவ காரணங்களுக்காக அவருக்கு லாகூா் மற்றும் இஸ்லாமாபாத் உயா்நீதிமன்றங்கள் ஜாமீன் வழங்கின.
அதையடுத்து, லாகூரிலுள்ள தனது சொந்த இல்லத்துக்கு நவாஸ் ஷெரீஃப் மாற்றப்பட்டாா். அவருக்கு லண்டனில் சிகிச்சை அளிக்கப்பட வேண்டும் என்று மருத்துவா்கள் வலியுறுத்தினா். அதற்கு நவாஸ் ஷெரீஃபும் சம்மதம் தெரிவித்தாா்.
இந்தச் சூழலில், வெளிநாட்டுப் பயணத் தடைப் பட்டியலில் இருந்து நவாஸ் பெயரை நீக்குவதற்கு பாகிஸ்தான் அரசு விதித்துள்ள நிபந்தனையை அவா் நிராகரித்துள்ளாா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
