ஆஸ்கர் விருதுகள் வழங்கும் நிகழ்ச்சியில் நகைச்சுவை நடிகர் கிரிஸ் ராக்கை வில் ஸ்மித் அறைந்ததை தொடர்ந்து, அவரை கைது செய்ய காவல்துறை தயாராக இருந்ததாக ஆஸ்கர் நிகழ்ச்சியின் தயாரிப்பாளர் வியாழக்கிழமை தகவல் வெளியிட்டுள்ளார்.
ஹாலிவுட் உலகையே அதிர்ச்சிக்குள்ளாக்கிய இந்த சம்பவம் நடைபெற்றதை தொடர்ந்து முதல்முறையாக ஆஸ்கர் நிகழ்ச்சியின் தயாரிப்பாளர் வில் பாக்கர் ஏபிசி தொலைக்காட்சிக்கு பேட்டி அளித்துள்ளார். அதில், காவல்துறையினர் வந்து ராக்கிடம் பேசும்போது நான் அவருடன் அமர்ந்திருந்தேன் என்றார்.
இதுகுறித்து விரிவாக பேசிய அவர், "அவரை (வில் ஸிமித்) கைது செய்வோம் என அவர்கள் தெரிவித்தனர். இப்போதே அவரை கைது செய்ய தயாராக இருக்கிறோம். நீங்கள் புகார் அளித்தால் அவரை கைது செய்வோம். எங்களுக்கு இருக்கும் வாய்ப்புகளை அவர்கள் பட்டியலிட்டனர். ஆனால், அந்த விருப்பங்களை ஏற்க கிரிஸ் ராக் மறுத்துவிட்டார். தான் நலமாக இருப்பதாக அவர் தெரிவித்தார்.
இந்த விவகாரத்தில் எங்கள் முன் இருக்கும் வாய்ப்புகளை எல்லாம் லாஸ் ஏஞ்சல்ஸ் காவல்துறையினர் பட்டியலிட்டனர். பின்னர், நாங்கள் நடவடிக்கை எடுக்க உங்களுக்கு விருப்பமா என கேட்டார்கள். ஆனால், அவர் மறுத்துவிட்டார்" என்றார்.
புகார் அளிக்க ராக் மறுத்துவிட்டதாக லாஸ் ஏஞ்சல்ஸ் காவல்துறை முன்னதாகவே தெரிவித்திருந்தனர். ஆஸ்கர் விருதுகள் வழங்கும் நிகழ்ச்சி மேடையில் தனது மனைவி குறித்து கேலியாக பேசியதற்கு அமெரிக்க நகைச்சுவை நடிகர் ராக்கை வில் ஸ்மித் அறைந்தது பெரும் அதிர்ச்சியை ஏற்படுத்தியிருந்தது.
இதையும் படிக்க | ரஷியாவின் தெற்கு குரில் தீவுகளுக்கு அருகே நிலநடுக்கம்
இந்த சம்பவம் நடைபெற்று அரை மணி நேரத்திலேயே சிறந்த நடிகருக்கான ஆஸ்கர் விருது கிங் ரிச்சர்ட் படத்திற்காக வில் ஸ்மித்துக்கு வழங்கப்பட்டது. நிகழ்ச்சியில் இருந்த நட்சத்திரங்கள் பலத்த கரகோஷம் எழுப்பிய நிலையில், அவர் விருதை பெற்று கொண்டார்.
முன்னதாக, ஆஸ்கர் விருதுகள் வழங்கும் அகாடமி ஆஃப் மோஷன் பிக்சர் ஆர்ட்ஸ் அண்ட் சயின்ஸ் நிறுவனம், இந்த சம்பவம் குறித்து விளக்கம் அளித்திருந்தது. அதில், ராக்கை வில் ஸிம்த் அறைந்த பிறகு, நிகழ்ச்சியிலிருந்து வெளியேறும்படி அவரை கேட்டு கொண்டோம். ஆனால், அவர் மறுத்துவிட்டதாக கூறினர்.