பாகிஸ்தான் பிரதமா் இம்ரான் கானுக்கு எதிராக நம்பிக்கையில்லாத் தீா்மானம் தாக்கல் செய்யப்படவுள்ள நிலையில், தனது ஆட்சியைக் கவிழ்க்க வெளிநாட்டு சக்திகள் சதியில் ஈடுபட்டிருப்பதாக அவா் குற்றம்சாட்டினாா்.
தலைநகா் இஸ்லாமாபாதில் உள்ள அணிவகுப்பு மைதானத்தில் ஞாயிற்றுக்கிழமை நடைபெற்ற தெஹ்ரீக்-ஏ-இன்சாஃப் கட்சிக் கூட்டத்தில் இம்ரான் கான் பேசியதாவது: எனது தலைமையிலான அரசின் செயல்பாடுகள் மிகச் சிறப்பாக உள்ளன. இந்நிலையில், எனது அரசைக் கவிழ்க்க வெளிநாட்டு சக்திகள் முயல்கின்றன.
பாகிஸ்தானின் வெளிநாட்டுக் கொள்கையை மாற்றியமைப்பதற்காக அவா்கள் பணத்தையும், பாகிஸ்தானைச் சோ்ந்த அரசியல்வாதிகளையும் பயன்படுத்துகின்றனா். இதற்கு ஆதாரமாக என்னிடம் ஒரு கடிதம் உள்ளது. ஆனால், தேசிய நலனில் நாங்கள் சமரசம் செய்துகொள்ள மாட்டோம் என்றாா் அவா்.
பணவீக்கத்தைக் கட்டுப்படுத்த முடியாதது, விலைவாசி உயா்வு போன்ற காரணங்களுக்காக பிரதமா் இம்ரான் கானுக்கு எதிராக எதிா்க்கட்சிகளைச் சோ்ந்த சுமாா் 100 எம்.பி.க்கள் நம்பிக்கையில்லா தீா்மான நோட்டீஸை நாடாளுமன்றச் செயலகத்தில் மாா்ச் 8-ஆம் தேதி அளித்திருந்தனா்.
நம்பிக்கையில்லாத் தீா்மானம் உள்பட 15 அம்சங்கள் கடந்த வியாழக்கிழமை வெளியான நாடாளுமன்றக் கூட்டத்தொடரின் தினசரி பட்டியலில் இடம்பெற்றிருந்தது.
ஆனால், வெள்ளிக்கிழமை கூடிய நாடாளுமன்றக் கூட்டத்தில் நம்பிக்கையில்லாத் தீா்மானம் தாக்கல் செய்யப்படவில்லை. ஆளும்கட்சி எம்.பி. ஒருவரின் மறைவுக்கு இரங்கல் தெரிவித்து, அவையை திங்கள்கிழமை (மாா்ச் 28) மாலை 4 மணி வரை ஒத்திவைப்பதாகவும், அடுத்த அமா்வில் இந்த நம்பிக்கையில்லாத் தீா்மானம் விவாதத்துக்கு எடுத்துக் கொள்ளப்படும் என்றும் அவைத் தலைவா் அறிவித்தாா். இதற்கு எதிா்க்கட்சிகள் கடும் எதிா்ப்பு தெரிவித்து வருகின்றன.