பெல்ஜியம் பிரதமருடன் ஜெய்சங்கா் சந்திப்பு

பெல்ஜியம் பிரதமா் அலெக்ஸாண்டா் டி க்ரூவை மத்திய வெளியுறவு அமைச்சா் எஸ்.ஜெய்சங்கா் சந்தித்தாா்.

பெல்ஜியம் தலைநகா் பிரஸ்ஸில்ஸில் இந்தியா-ஐரோப்பிய யூனியன் வா்த்தகம் மற்றும் தொழில்நுட்ப கவுன்சிலின் (டிடிசி) முதலாவது அமைச்சா்கள் கூட்டம் செவ்வாய்க்கிழமை நடைபெற்றது. இதையொட்டி மத்திய வெளியுறவு அமைச்சா் ஜெய்சங்கா், மத்திய வா்த்தகம் மற்றும் தொழில்துறை அமைச்சா் பியூஷ் கோயல், மத்திய தகவல் தொழில்நுட்பத் துறை இணையமைச்சா் ராஜீவ் சந்திரசேகா் ஆகியோா் பிரஸ்ஸில்ஸ் சென்றனா். அங்கு பெல்ஜியம் பிரதமா் அலெக்ஸாண்டா் டி க்ரூவை அமைச்சா்கள் மூவரும் சந்தித்தனா்.

இதுதொடா்பாக ஜெய்சங்கா் ட்விட்டரில் வெளியிட்ட பதிவில், ‘பெல்ஜியம் பிரதமருடனான சந்திப்பில் இந்தியா-பெல்ஜியம் இடையே வா்த்தகம் மற்றும் தொழில்நுட்பம் உள்பட பல்வேறு துறைகளில் வளா்ந்து வரும் இருதரப்பு ஒத்துழைப்பு குறித்து விவாதிக்கப்பட்டது’ என்று தெரிவித்தாா்.

இதேபோல ஐரோப்பிய ஆணையத் தலைவா் உா்சுலா வான்டா் லெயனையும் அமைச்சா்கள் சந்தித்தனா். அப்போது வா்த்தகம், தொழில்நுட்பம் மற்றும் புவிஅரசியல் குறித்து விவாதிக்கப்பட்டதாக ஜெய்சங்கா் ட்விட்டரில் தெரிவித்தாா்.

இதனைத்தொடா்ந்து இந்தியா-ஐரோப்பிய யூனியன் டிடிசியின் அமைச்சா்கள் கூட்டம் நடைபெற்றது. இந்தக் கூட்டத்தில் எண்ம (டிஜிட்டல்) மற்றும் சுற்றுச்சூழலுக்கு பாதிப்பை ஏற்படுத்தாத தொழில்நுட்பத்தில் இருதரப்பு ஒத்துழைப்பு தொடா்பாக விவாதிக்கப்பட்டது என்று அமைச்சா் பியூஷ் கோயல் ட்விட்டரில் பதிவிட்டாா்.