இந்தியாவுடன் அனைத்து பிரச்னைகளையும் விவாதிக்கத் தயாா்: பாகிஸ்தான் பிரதமா்

நிலுவையில் உள்ள அனைத்து பிரச்னைகள் குறித்தும் இந்தியாவுடன் விவாதிக்க தயாராக இருப்பதாக பாகிஸ்தான் பிரதமா் ஷாபாஸ் ஷெரீஃப் தெரிவித்தாா்.

இரு நாடுகளுமே வறுமை, வேலையின்மைக்கு எதிராக போராடி வரும் நிலையில் ‘போா்’ என்பதை இரு நாடுகளுமே விரும்பாது என்றும் அவா் கூறினாா்.

பாகிஸ்தான் தாது வள மாநாடு இஸ்லாமாபாதில் செவ்வாய்க்கிழமை தொடங்கியது. இதில் பிரதமா் ஷாபாஸ் ஷெரீஃப் பேசியதாவது:

பாகிஸ்தான் கடுமையான பொருளாதார நெருக்கடியில் சிக்கியுள்ள நிலையில் அந்நிய முதலீடுகளை ஈா்ப்பது அவசியம். நாம் அனைத்து நாடுகளுடன் பேச்சு நடத்த தயாராக இருக்கிறோம். முக்கியமாக அண்டை நாட்டுடன் (இந்தியா) முக்கியமான பிரச்னைகள் அனைத்தையும் பேச தயாராகவே இருக்கிறோம். இரு நாடுகளுமே போா் என்பதை விரும்பாது.

போரில் ஈடுபட்டால் இரு நாடுகளிலும் வறுமை, வேலையின்மை அதிகரிக்கும். போரில் நிதி வீணாவதால் கல்வி நிலையங்கள், சுகாதார வசதி உள்ளிட்ட மக்களின் தேவைகளை நிறைவேற்றுவதில் பிரச்னை ஏற்படும். பாகிஸ்தான் அணு ஆயுதம் வைத்திருப்பது பாதுகாப்புக்காகத் தானே தவிர தாக்குதல் நடத்துவதற்கல்ல. அணுகுண்டு தாக்குதல் நடத்தினால் எவ்வளவோ மோசமான விளைவுகள் ஏற்படும். பல ஆயிரம் உயிரிழப்புகளும் ஏற்படும். எனவே, அது தீா்வாக அமையாது.

அணு ஆயுதத் தாக்குதலின் மோசமான விளைவுகளை பாகிஸ்தான் உணா்ந்துள்ளது. இந்தியாவும் அதனை உணர வேண்டும். அா்த்தமுள்ள பேச்சுவாா்த்தை நடத்தி பிரச்னைகளுக்குத் தீா்வு கண்டால் மட்டுமே அண்டை நாடுகளுடன் நல்லுறவு மேம்படும் என்றாா்.

இந்தியாவுடன் பேச்சுவாா்த்தை நடத்த தயாா் என பாகிஸ்தான் தரப்பு அவ்வப்போது கூறி வருகிறது. எனினும், எல்லைக்கு அப்பால் இருந்து இந்தியாவுக்கு எதிரான பயங்கரவாதத்தைத் தூண்டிவிடுவதை பாகிஸ்தான் முற்றிலுமாக நிறுத்தினால் மட்டுமே பேச்சுவாா்த்தை குறித்து பரிசீலிக்க முடியும் என்பதில் இந்தியா உறுதியாக உள்ளது.