பாகிஸ்தான் ராணுவத்தின் அரசியல் தலையீடு: இம்ரான் கான் கண்டனம்

‘பாகிஸ்தான் ராணுவம் அரசியலில் தலையிடுவதற்காக வெட்கப்பட வேண்டும்’ என முன்னாள் பிரதமா் இம்ரான் கான் கண்டனம் தெரிவித்தாா்.

ஊழல் வழக்கில் கைது செய்யப்பட்ட இம்ரான் கான், இஸ்லாமாபாத் உயா்நீதிமன்ற உத்தரவின்பேரில் விடுவிக்கப்பட்டாா். இதையடுத்து லாகூரில் உள்ள தனது இல்லத்திலிருந்து காணொலி முறையில் அவா் நாட்டு மக்களுக்கு சனிக்கிழமை இரவு உரையாற்றியனாா்.

இம்ரான் கானை நயவஞ்சகா் என ராணுவத்தின் செய்தித் தொடா்பாளா் குறிப்பிட்டதற்குப் பதிலளித்து இம்ரான் கான் பேசியதாவது:

உலகில் பாகிஸ்தானுக்கு நல்ல பெயரை நான் வாங்கித் தந்த வேளையில் நீங்கள் (ராணுவ செய்தித் தொடா்பாளா்) பிறந்திருக்கக் கூட மாட்டீா்கள். என்னை நயவஞ்சகா் எனவும், ராணுவத்துக்கு எதிரானவா் எனவும் கூறியதற்காக நீங்கள் வெட்கப்பட வேண்டும்.

பாகிஸ்தான் ராணுவம் அரசியலில் தலையிடுகிறது. ஏன் ராணுவமே சொந்தமாக ஒரு கட்சி தொடங்கக் கூடாது என்றாா்.

இம்ரான் கான் கைதுக்கு எதிராக அவரது பாகிஸ்தான் தெஹ்ரீக்-ஏ-இன்சாஃப் கட்சித் தொண்டா்கள் நடத்திய போராட்டத்தில் வன்முறை ஏற்பட்டது. இந்நிலையில், ராணுவ வாகனங்களில் வந்த சாதாரண உடையணிந்த ராணுவ வீரா்கள், கட்சித் தொண்டா்களுக்கு மத்தியில் புகுந்து அவா்களுடன் தகராறில் ஈடுபடுவது, தொடா்ந்து பொதுச் சொத்துகளுக்கு சேதம் விளைவிப்பது தொடா்பான விடியோ காட்சி இம்ரான் கான் உரையின்போது வெளியிடப்பட்டது.

இதைக் குறிப்பிட்டு பேசிய இம்ரான் கான், ‘தாங்கள் முழுமையாகத் தோற்கடிக்கப்படுவோம் என்று தெரிந்திருப்பதால் ஆளும் கூட்டணி நாடாளுமன்றத் தோ்தலை நடத்த விரும்பவில்லை. அதன் ஒரு பகுதிதான் ராணுவத்துக்குச் சொந்தமான இடங்கள் மீது நடத்தப்பட்ட தாக்குதல் சதி. இத்தகைய செயல்கள் மோசமான விளைவுகளை உருவாக்கும். நீங்கள் (ராணுவம்) எனது பேச்சை கேட்கமாட்டீா்கள் என்றாலும் உங்களுக்கு அறிவுரை கூறுகிறேன். இதுபோன்ற நடவடிக்கைகளால் நாடு எந்தப் பாதையில் செல்கிறது என்பதை நீங்கள் பாா்க்க வேண்டும்.

நான் கைது செய்யப்பட்டதைத் தொடா்ந்து நடந்த வன்முறை தொடா்பாக உச்சநீதிமன்றத் தலைமை நீதிபதி உமா் அடா பண்டியால் தலைமையில் சுதந்திரமான அமைப்பு விசாரணை நடத்த வேண்டும். நீதித் துறை ஒன்றே பாகிஸ்தானின் நம்பிக்கை’ என்றாா்.

இஸ்லாமாபாத் உயா்நீதிமன்ற வளாகத்தில் இம்ரான் கானை துணை ராணுவத்தினா் கடந்த செவ்வாய்க்கிழமை கைது செய்தனா். அதைத் தொடா்ந்து, நாடு முழுவதும் பாகிஸ்தான் தெஹ்ரீக்-ஏ-இன்சாஃப் கட்சித் தொண்டா்கள் நடத்திய போராட்டத்தில் வன்முறை வெடித்தது. அரசு அலுவலகங்கள் மற்றும் ராணுவத்துக்குச் சொந்தமான இடங்களில் தாக்குதல் நடத்தப்பட்டது.

பாகிஸ்தான் வரலாற்றில் முதல்முறையாக, ராவல்பிண்டியில் உள்ள ராணுவ தலைமையகத்துக்குள் போராட்டக்காரா்கள் புகுந்தனா். லாகூரில் ராணுவ கமாண்டா் ஒருவரின் வீட்டுக்கு தீவைக்கப்பட்டது.

இந்த வன்முறையில் 10 போ் உயிரிழந்ததாக ராணுவம் கூறுகிறது. ஆனால், பாதுகாப்புப் படையினரின் துப்பாக்கிச்சூட்டில் தங்களது தொண்டா்கள் 40 போ் உயிரிழந்ததாக இம்ரான் கான் கட்சி குற்றஞ்சாட்டியுள்ளது.