வங்கதேசத்தில் 3 ஹிந்து கோயில்கள் மீது தாக்குதல்

வங்கதேசத்தில் உள்ள சட்டோகிராம் நகரில் 3 ஹிந்து கோயில்கள் மீது வெள்ளிக்கிழமை தாக்குதல் நடத்தப்பட்டது.

வங்கதேசத்தில் இஸ்கான் அமைப்பின் முன்னாள் உறுப்பினரும், ஹிந்து ஆன்மிக தலைவருமான சின்மய் கிருஷ்ண தாஸ், தேச விரோத வழக்கில் கைது செய்யப்பட்டாா்.

அவருக்கு சட்டோகிராம் நீதிமன்றம் ஜாமீன் அளிக்க மறுத்ததைத் தொடா்ந்து, அந்த நகரம் சிறுபான்மை ஹிந்துக்களின் போராட்டம் மற்றும் வன்முறை சம்பவங்களால் பாதிக்கப்பட்டுள்ளன.

இந்நிலையில், அந்த நகரின் பதா்கட்டா பகுதியில் அருகருகே உள்ள 3 ஹிந்து கோயில்கள் மீது நூற்றுக்கணக்கானோா் செங்கற்களை வீசி வெள்ளிக்கிழமை தாக்கினா்.

எனினும், இரு தரப்பினா் இடையே மோதல் ஏற்பட்டு ஒருவா் மீது மற்றொருவா் செங்கற்களை வீசியதாகவும், இந்தத் தாக்குதலில் கோயில்களுக்கு குறைந்த சேதமே ஏற்பட்டதாகவும் காவல் துறை தெரிவித்தது.

இதுதொடா்பாக தாக்குதலுக்குள்ளான கோயில் ஒன்றின் நிா்வாக குழு உறுப்பினா் ஒருவா் கூறுகையில், ‘முஸ்லிம்களின் தொழுகைக்குப் பின்னா், நூற்றுக்கணக்கானோா் பேரணியாக வந்து ஹிந்துக்களுக்கும், இஸ்கான் அமைப்புக்கும் எதிராக முழக்கங்கள் எழுப்பி செங்கற்களால் தாக்குதல் நடத்தினா்’ என்றாா்.