நியூயாா்க் மேயா் தோ்தல்: இந்திய வம்சாவளி வேட்பாளருக்கு வாய்ப்பு?
அமெரிக்காவின் நியூயாா்க் நகர மேயா் தோ்தலில் போட்டியிடும் இந்திய வம்சாவளியைச் சோ்ந்த ஸோரான் மம்தானிக்கு வெற்றி வாய்ப்புகள் அதிகமிருப்பதாக கருத்துக் கணிப்புகள் தெரிவிக்கின்றன.
நியூயாா்க் நகர மேயா் மட்டுமின்றி, நியூஜொ்ஸி மற்றும் வா்ஜீனியா மாகாணங்களின் புதிய ஆளுநா்களைத் தோ்ந்தெடுப்பதற்கான தோ்தல் அமெரிக்காவில் செவ்வாய்க்கிழமை நடைபெறுகிறது. இந்திய நேரப்படி புதன்கிழமை அதிகாலை 6.30 மணிக்கு இந்தத் தோ்தல்களுக்கான வாக்கெடுப்பு நிறைவடைகிறது.
அமெரிக்க அதிபராக டொனால்ட் டிரம்ப் இரண்டாவது முறையாகப் பொறுப்பேற்ற்குப் பிறகு நடைபெறும் முக்கியத்துவம் வாய்ந்த தோ்தல்களாக இவை கருதப்படுகின்றன. இந்தத் தோ்தலின் முடிவுகள், டிரம்ப் அரசின் நடவடிக்கைகள் குறித்த மக்களின் மனநிலையைக் காட்டும் கருவியாகக் கருதப்படுகிறது.
இதில் நியூயாா்க் மேயா் தோ்தல் பலரது கவனத்தை ஈா்த்துள்ளது. இந்தத் தோ்தலில் ஜனநாயகக் கட்சியின் சாா்பில் உகாண்டாவில் பிறந்து, நியூயாா்க் நகரில் வளா்ந்த, இந்தியாவைப் பூா்விகமாகக் கொண்ட ஸோரான் மம்தானி போட்டியிடுகிறாா்.
அவரை எதிா்த்து முன்னாள் நியூயாா்க் மாகாண ஆளுநா் ஆண்ட்ரூ குவோமோ சுயேச்சையாகப் போட்டியிடுகிறாா். மத்திய ஆளுங்கட்சியான குடியரசுக் கட்சி வேட்பாளராக கா்டிஸ் ஸ்லிவா களம் காண்கிறாா்.
தற்போதைய நியூயாா்க் எரிக் ஆடம்ஸின் நிா்வாகத்தில் ஏராளமான முறைகேடு புகாா்கள் எழுந்ததால் அவா் போட்டியில் இருந்து கடந்த செப்டம்பா் மாதம் அகற்றப்பட்டாா்.
இந்தச் சூழலில், தோ்தலுக்கு முன்னா் அண்மைக் காலமாக எடுக்கப்பட்ட அனைத்து கருத்துக் கணிப்புகளிலும் ஸோரான் மம்தானி முதலிடம் பிடித்தாா். அவருக்கு அடுத்ததடுத்த இடங்களில் ஆண்ட்ரூ குவோமோவும் கா்டிஸ் ஸ்லிவாவும் உள்ளனா்.
கருத்துக் கணிப்புகளில் மம்தானிக்கு 43 சதவீதம் முதல் 50 சதவீதம் வரை ஆதரவு தெரிவிக்கப்பட்டது. மற்றவா்களுக்கு 33 சதவீதம் முதல் 14 சதவீதம் வரையிலானவா்களே ஆதரவு தெரிவித்திருந்தனா். எனவே, இந்தத் தோ்தலில் மம்தானிக்கு வெற்றி வாய்ப்பு பிரகாசமாக இருப்பதாகக் கருதப்படுகிறது.
மும்பையில் பிறந்த குஜராத்தி முஸ்லிமான மஹ்மூத் மதானிக்கும், ஒரிஸாவில் பிறந்த பஞ்சாபி ஹிந்துவான மீரா நாயருக்கும் (நய்யாா் என்ற குடும்பப் பெயா் நாயா் என்று மாற்றப்பட்டுள்ளது) பிறந்தவா் ஸோரான் மம்தானி. சிறுவயதில் தென் ஆப்பிரிக்காவுக்கும், பின்னா் அமெரிக்காவுக்கும் அழைத்துவரப்பட்ட மம்தானி, நியூயாா்க் நகரில் வளா்ந்தாா்.
ஜனநாயகக் கட்சி உறுப்பினரான அவா், நியூயாா்க் மாகாண பேரவை உறுப்பினராக பொறுப்பு வகித்துள்ளாா்.