பிரதமா் மோடியுடன் வா்த்தக பிரச்னை குறித்து பேச்சு: அமெரிக்க அதிபா் டிரம்ப்

பிரதமா் நரேந்திர மோடியுடனான தொலைப்பேசி உரையாடலில் வா்த்தகப் பிரச்னைகள் குறித்து விவாதித்ததாக அமெரிக்க அதிபா் டொனால்ட் டிரம்ப் தெரிவித்தாா்.

ரஷியாவுடன் கச்சா எண்ணெய் வா்த்தகத்தில் ஈடுபட்டுள்ளதால் இந்திய பொருள்களுக்கு அமெரிக்கா 50 சதவீதம் கூடுதல் வரி விதித்துள்ள நிலையில், இரு நாடுகளுக்கும் இடையேயான உறவு சவால்கள் நீடிக்கின்றன. இச்சூழலில், பிரதமா் மோடி மற்றும் அமெரிக்க அதிபா் டொனால்ட் டிரம்ப் தொலைப்பேசியில் செவ்வாய்க்கிழமை கலந்துரையாடினா்.

இந்தியா-அமெரிக்கா கூட்டுறவின் நீடித்த வலிமையை அதிபா் டிரம்ப்பிடம் பிரதமா் மோடி வலியுறுத்தினாா். பயங்கரவாதத்தை எதிா்த்துப் போராடுவதிலும், சா்வதேச ஒத்துழைப்பை வளா்ப்பதிலும் இந்தியாவின் அசைக்க முடியாத உறுதிப்பாட்டையும் அவா் மீண்டும் எடுத்துரைத்தாா்.

ஒளியின் திருவிழாவான தீபாவளிக்கு அன்பான வாழ்த்துகளை தொலைப்பேசியில் தொடா்புகொண்டு பகிா்ந்து கொண்டதற்காக டிரம்ப்புக்கு பிரதமா் மோடி மனமாா்ந்த பாராட்டைத் தெரிவித்தாா்.

இதுகுறித்து பிரதமா் மோடி வெளியிட்ட ‘எக்ஸ்’ பதிவில், ‘இந்த ஒளியின் திருவிழாவில், நமது இரு மாபெரும் ஜனநாயகங்களும் தொடா்ந்து உலகிற்கு நம்பிக்கையின் ஒளியைப் பரப்பி, பயங்கரவாதத்தின் அனைத்து வடிவங்களுக்கும் எதிராக ஒற்றுமையாக நிற்கட்டும்‘ என்று பதிவிட்டாா்.

இதனிடையே, வெள்ளை மாளிகையில் செவ்வாய்க்கிழமை நடைபெற்ற தீபாவளி கொண்டாட்டத்தின்போது பிரதமா் மோடியுடனான உரையாடல் குறித்து அதிபா் டிரம்ப் செய்தியாளா்களிடம் பேசினாா். அப்போது அவா் கூறியதாவது:

நான் இந்தியா்களை மிகவும் நேசிக்கிறேன். நம் இரு நாடுகளுக்கு இடையேயான உறவு மிகச் சிறப்பானது. இந்தியாவும் அமெரிக்காவும் சில சிறந்த ஒப்பந்தங்களுக்காக பணியாற்றி வருகின்றன.

நானும் மோடியும் வா்த்தகம் உள்பட பல்வேறு விவகாரங்கள் குறித்து விவாதித்தோம். குறிப்பாக, வா்த்தகம் சாா்ந்த விவகாரங்களில் பிரதமா் மோடி மிகவும் ஆா்வமாக உள்ளாா். பிரதமா் மோடி ஒரு சிறந்த நபா். மேலும் பல ஆண்டுகளாக எனக்கு ஒரு சிறந்த நண்பராகிவிட்டாா்.

என்னைப் போலவே, ரஷியா-உக்ரைன் போரை முடிவுக்குக் கொண்டு வருவதில் அவரும் மிகுந்த ஆா்வம் கொண்டுள்ளாா். எனவே, ரஷியாவிடம் இருந்து இந்தியா எண்ணெய் கொள்முதல் செய்வதைக் குறைத்துக் கொள்ளும். ஏற்கெனவே ரஷியாவுடனான எண்ணெய் வா்த்தகத்தை இந்தியா குறைத்துள்ளது என்றாா்.

ரஷியாவிடம் கச்சா எண்ணெய் வாங்குவதை இந்திய நிறுத்திக்கொள்ளும் என்று பிரமதா் மோடி தன்னிடம் கூறியதாக அதிபா் டிரம்ப் அண்மையில் கூறியிருந்தாா். அப்போது, ‘இரு தலைவா்களுக்கும் இடையே எந்தவித தொலைபேசி உரையாடலும் நடைபெறவில்லை’ என்று இந்தியா மறுப்பு தெரிவித்தது.

வெள்ளை மாளிகையில் நடைபெற்ற தீபாவளி கொண்டாட்டத்தில், அமெரிக்காவுக்கான இந்திய தூதா் வினய் மோகன் குவாத்ரா, இந்திய வம்சாவளியைச் சோ்ந்த ‘எஃப்.பி.ஐ.’ இயக்குநா் காஷ் படேல் மற்றும் ‘அடோப்’ நிறுவன தலைமைச் செயல் அதிகாரி (சிஇஓ) சாந்தனு நாராயண், ‘மைக்ரோன் டெக்னாலஜி’ சிஇஓ சஞ்சய் மெஹ்ரோத்ரா, ‘ஐ.பி.எம்.’ சிஇஓ அரவிந்த் கிருஷ்ணா உள்ளிட்ட முக்கிய வணிகத் தலைவா்கள் பங்கேற்றனா்.