பாகுபலி தி கிரேட் திரைப்படத்தில் சிவகாமி தி கிரேட் கதாபாத்திரத்தில் நடித்ததின் மூலமாக மொத்த இந்தியாவையும் ‘இதுவே என் கட்டளை! என் கட்டளையே சாசனம்’ என முழங்க வைத்தவர் நடிகை ரம்யா கிருஷ்ணன். சிவகாமி கதாபாத்திரம் அவருக்குப் பெற்றுத் தந்த பெருமைகள் கொஞ்ச நஞ்சமல்ல! ஆயினும், திரைக்கதை உருவாக்கத்தின் போது இயக்குனரது மனதில் அந்தக் கதாபாத்திரத்துக்காக அவர் தேர்வு செய்து வைத்திருந்தது ரம்யா கிருஷ்ணனை அல்ல நடிகை ஸ்ரீதேவியை என்ற உண்மையை இயக்குனரே அப்படத்தின் ஆடியோ ரிலீஸ் விழா ஒன்றின் போது தெரிவித்திருந்தார். தெரிவித்ததோடு மட்டுமல்ல, ஸ்ரீதேவி அத்திரைப்படத்தில் நடிக்க ஒப்புக் கொள்ளாவிடினும் இழப்பேதுமில்லை. நல்ல வேலை அவர் மறுத்ததால் ரம்யா கிருஷ்ணனைத் தேர்வு செய்தோம் என்றாலும் அவர் அளவுக்கு சிவகாமி கதாபாத்திரத்துக்கு எவராலும் நியாயம் செய்திருக்க முடியாது. என்று ரம்யாவை வெகுவாகப் புகழ்ந்திருந்தார் அப்படத்தின் இயக்குனர் எஸ்.எஸ்.ராஜமெளலி.
அதே மாதிரியான சூழல் தற்போது மற்றொரு தெலுங்குத் திரைப்படத்திலும் நிகழ்வுள்ளதாம். நாக சைதன்யா நடிப்பில் விரைவில் அறிவிக்கப்படவிருக்கும் புதிய திரைப்படமான ‘ஷைலஜாரெட்டி அல்லுடு’ (ஷைலஜா ரெட்டியின் மருமகன்) எனும் திரைப்படத்தில் மாமியாராக நடிக்க முதலில் ரம்யா கிருஷ்ணனிடம் பேச்சு வார்த்தை நடத்தப்பட்டு முடிவு செய்யப்பட்டிருந்த நிலையில் தற்போது அந்தக் கதாபாத்திரத்தில் ஸ்ரீதேவி நடித்தால் பொருத்தமாக இருக்கும் என படத்தயாரிப்புக் குழு நினைக்கிறதாம். ஆனால், ஸ்ரீதேவி சைதன்யாவுக்கு மாமியாராக நடிக்க ஒப்புக்கொள்வாரா எனத் தெரியாத காரணத்தால் நாகார்ஜுனாவிடமே ஸ்ரீதேவியிடம் அனுமதி கேட்கும் வேலையை ஒப்படைத்திருக்கிறார்களாம். ஸ்ரீதேவி, முன்னதாக நாகார்ஜுனாவுடனும், அவரது தந்தை நாகேஸ்வர ராவுடனும் திரைப்படங்களில் நடித்தவர் என்பதால் நாகார்ஜுனா வேண்டுகோள் விடுத்தால் அவர் இப்படத்தில் நடிக்க ஒப்புக் கொள்ளலாம் என தயாரிப்பாளர்கள் நினைக்கிறார்கள். மொத்தத்தில் படக்குழுவினரால், சைதன்யாவுக்கு யாரை மாமியாராக்குவது? எனும் விஷயத்தில் இன்னமும் ஒரு தெளிவான முடிவெடுக்க இயலவில்லை.
ஸ்ரீதேவிக்கு பாகுபலியில் பறிபோன தென்னிந்திய சினிமா வெற்றி வாய்ப்பை ‘ஷைலஜா ரெட்டி அல்லுடு’ பெற்றுத்தருமா? எனப் பொறுத்திருந்து காணலாம்.
நாகார்ஜுனா நடிப்பில் வெளிவந்து சக்கைப் போடு போட்ட தெலுங்குத் திரைப்படமான ‘அல்லரி அல்லுடு’ எனும் திரைப்படத்தின் நவீன் வெர்சன் தான் ஷைலஜா ரெட்டி அல்லுடு’ என்கிறது டோலிவுட்.
கிட்டத்தட்ட கோலிவுட்டின் அரதப் பழசான திரைக்கதையான ‘மாப்பிள்ளை’ படத்து ராஜ ராஜேஸ்வரி ஸ்ரீவித்யா டைப் மாமியார் கதைகளில் ஒன்று தான் அத்திரைப்படமும். தெலுங்கில் அல்லரி அல்லுடு திரைப்படத்தில் அந்தக் கதாபாத்திரத்தை பழம்பெரும் நடிகை வாணிஸ்ரீ செய்திருந்தார்.
தற்போது நவீன ராஜராஜேஸ்வரி மன்னிக்கவும் ஷைலஜா யார் என்பதில் தான் போட்டியே!
ஸ்ரீதேவியா? ரம்யா கிருஷ்ணனா?!