இலங்கைக்கு எதிரான முதல் டெஸ்ட் போட்டியில் இந்திய அணி 74 ரன்களுக்கு 5 விக்கெட்டுகளை இழந்து தடுமாறி வருகிறது.
இந்நிலையில் இலங்கை பந்துவீச்சாளர் லக்மல் ஒரு சாதனை புரிந்துள்ளார்.
* நேற்று ஒரு ரன்னும் கொடுக்காமல் பந்துவீசிய 30 வயது சுரங்கா லக்மல், 46 பந்துகளுக்குப் பிறகு ரன் கொடுத்தார். அவருடைய பந்தில் ரஹானே ஒரு பவுண்டரி அடித்து கணக்கை ஆரம்பித்தார்.
2001க்குப் பிறகு தொடர்ந்து 7 ஓவர்கள் மெயிடனாக வீசி, 46 பந்துகளுக்குப் பிறகு ரன் கொடுத்த ஒரே வீரர் - லக்மல் என்கிற பெருமையைப் பெற்றுள்ளார். 2015-ல் ஜெரோம் டெய்லர், ஆஸ்திரேலியாவுக்கு எதிராக 40 பந்துகள் ரன் எதுவும் கொடுக்காமல் வீசினார்.
* இதற்கு முன்பு லக்மல், 2014-ல் கேலேவில் தென் ஆப்பிரிக்கா அணிக்கு எதிராக 27 பந்துகளில் ரன் எதுவும் கொடுக்காமல் இருந்தார். அதன்பிறகு இப்போது 46 பந்துகளில் ரன் எதுவும் கொடுக்கவில்லை.
முதல் 6 ஓவர்களில் ரன் எதுவும் கொடுக்காமல் அதிக விக்கெட்டுகள் எடுத்த வீரர்கள்:
3 - லக்மல் (இலங்கை) - 2017-ல் இந்தியாவுக்கு எதிராக
2 - மார்டின் (இங்கிலாந்து) - 1995-ல் தென் ஆப்பிரிக்காவுக்கு எதிராக
2 - டஃப்பி (நியூஸிலாந்து) - 2002-ல் இந்தியாவுக்கு எதிராக
* லக்மல் டெஸ்ட் போட்டியின் முதல் பந்தில் விக்கெட்டை வீழ்த்தியது இது 2-ஆவது முறையாகும். முன்னதாக, கடந்த 2010-ஆம் ஆண்டில் இலங்கையில் நடைபெற்ற போட்டியில் மேற்கிந்திய தீவுகளின் கிறிஸ் கெயிலை அவர் இவ்வாறு வீழ்த்தியிருந்தார்.
* இந்தியாவில் நடைபெறும் டெஸ்ட் போட்டியில் முதல் பந்தில் விக்கெட் வீழ்த்திய முதல் இலங்கை வீரர் என்ற பெருமையை சுரங்கா லக்மல் பெற்றுள்ளார். முன்பு எந்த இலங்கை பந்துவீச்சாளரும் அவ்வாறு விக்கெட் வீழ்த்தியதில்லை.
* 2005-ல் சென்னையில் நடைபெற்ற டெஸ்ட் போட்டியில் இலங்கையின் சமந்தா வாஸ் 11 ஓவர்கள் (66 பந்துகள்) ரன் எதுவும் கொடுக்கவில்லை. ரன் கொடுக்காமல் அதிக மெயிடண்கள் எடுத்த பந்துவீச்சாளர் என்கிற சாதனையை லக்மலால் முறியடிக்கமுடியவில்லை. அவரால் 7 ஓவர்கள் மட்டுமே மெயிடன் எடுக்கமுடிந்தது.
* இந்தியாவில் நடைபெறும் டெஸ்டில் முதல் இன்னிங்ஸில் ரன்கள் கொடுக்காமல் 3 விக்கெட்டுகள் வீழ்த்திய 2-ஆவது வீரர் சுரங்கா லக்மல் ஆவார். முதல் வீரராக, ஆஸ்திரேலியாவின் ரிச்சி பெனாவ்ட் கடந்த 1959-இல் அவ்வாறு விக்கெட் வீழ்த்தியிருந்தார்.