"மின் தட்டுப்பாடு பிரச்னையைத் தீர்க்க அரசு நடவடிக்கை எடுக்க வேண்டும்

கர்நாடகத்தில் நிலவும் மின் தட்டுப்பாடு பிரச்னையைத் தீர்க்க, மாநில அரசு நடவடிக்கை எடுக்கவேண்டும் என கர்நாடக மாநில திமுக வலியுறுத்தியுள்ளது.

பெங்களூரில் ஞாயிற்றுக்கிழமை கர்நாடக மாநில திமுக நிர்வாகிகள் கூட்டம், அக்கட்சியின் மாநில அவைத் தலைவர் மொ.பெரியசாமி தலைமையில் நடைபெற்றது.

இக்கூட்டத்தில், கட்சியின் மாநில அமைப்பாளர் ந.இராமசாமி, பொருளர் தட்சிணாமூர்த்தி உள்ளிட்டோர் கலந்து கொண்டனர்.

நிறைவேற்றப்பட்ட தீர்மானங்கள்: மூடநம்பிக்கைகளை வெளிப்படையாக எதிர்த்தும், எழுதியும் வந்த சாகித்ய அகாதெமி விருதுபெற்ற தலைசிறந்த கன்னட எழுத்தாளரும், பகுத்தறிவாதியுமான எம்.எம்.கலபுர்கியை மர்ம நபர்கள் கொலை செய்ததை வன்மையாகக் கண்டிப்பதோடு, அவரை இழந்துவாடும் குடும்பத்தினருக்கு ஆழ்ந்த இரங்கலைத் தெரிவித்துக் கொள்கிறோம்.

கர்நாடக மாநில திமுக சார்பில், முப்பெரும் விழா நடத்தப்படும்.

கர்நாடகத்தில் தினமும் 4-6 மணி நேரம் மின்வெட்டு அமல்படுத்தப்பட்டுள்ளது. இதனால், பொதுமக்கள், குறிப்பாக மாணவர்கள் பெரிதும் பாதிக்கப்படுகின்றனர். தொழிற்சாலைகள், கல்வி நிலையங்கள், அலுவலகங்களில் வேலைசெய்ய முடியாத நிலை ஏற்பட்டுள்ளது. எனவே, மின் தட்டுப்பாடு பிரச்னையைத் தீர்க்க மாநில அரசு போர்க்கால அடிப்படையில் நடவடிக்கை எடுக்க வேண்டும்.

திமுக தலைவர் மு.கருணாநிதி எழுதியுள்ள கடிதங்களின் அடிப்படையில், இலங்கைத் தமிழர் உரிமையை நிலைநாட்டிட பிரதமர் நரேந்திரமோடி நடவடிக்கை எடுக்க வேண்டும். கழக கொள்கைகளை பிரசாரம் செய்யவும், அறிவார்ந்த சமூகத்தை உருவாக்குவதற்காகவும் பொது நூலகம் அமைக்க தீர்மானிக்கப்படும்.