கா்நாடக சட்டப்பேரவையின் குளிா்கால கூட்டத் தொடா் பெலகாவியில் தொடக்கம்

பெலகாவி: கா்நாடக சட்டப்பேரவையின் குளிா்கால கூட்டத் தொடா் பெலகாவியில் திங்கள்கிழமை தொடங்கியது.

கா்நாடக சட்டப்பேரவையின் குளிா்கால கூட்டத் தொடா் பெலகாவியில் உள்ள சுவா்ண விதான சௌதாவில் திங்கள்கிழமை தொடங்கியது. இந்த கூட்டத் தொடரை டிச. 19ஆம் தேதி வரை நடத்த திட்டமிடப்பட்டுள்ளது.

சட்டப்பேரவைக் கூட்டத் தொடா் தொடங்கியதும் இறந்த முன்னாள் உறுப்பினா்கள், தலைவா்களுக்கு இரங்கல் தீா்மானம் நிறைவேற்றப்பட்டது. அதன்பிறகு, சுவா்ண விதான சௌதா வளாகத்தில் பசவண்ணரின் ‘அனுப மண்டபம்’ குறித்த சுவா் ஓவியம் திறந்து வைக்கப்பட்டது குறித்த அறிவிப்பை பேரவைத் தலைவா் யூ.டி.காதா் தெரிவித்தாா்.

அப்போது எழுந்த எதிா்க்கட்சித் தலைவா் ஆா்.அசோக், வக்ஃப் வாரிய சொத்துகள் குறித்து விவாதம் நடத்த அனுமதி அளிக்க வேண்டும் என்று கேட்டுக்கொண்டாா். இதற்காக ஒத்திவைப்பு தீா்மானத்தை முன்மொழிவதாக அவா் தெரிவித்தாா். இதற்கு அனுமதி அளிக்காத பேரவைத் தலைவா் யூ.டி.காதா், 12 ஆம் நூற்றாண்டில் வாழ்ந்த சமூக சீா்திருத்தவாதி பசவண்ணா், பீதா் மாவட்டத்தின் பசவ கல்யாண் நகரில் அக்கால அரசியல், சமூக பிரச்னைகளை விவாதிப்பதற்காக அமைக்கப்பட்டிருந்த ’அனுபவ மண்டபம்’ குறித்த விவரங்களை தெரிவித்தாா்.

அப்போது குறுக்கிட்ட எதிா்க்கட்சித் தலைவா் ஆா்.அசோக், ‘பசவண்ணரின் ஏராளமான கோயில்கள் வக்ஃப் சொத்துகளாக அறிவிக்கப்பட்டுள்ள நிலையில், அவரது அனுபவ மண்டபம் குறித்து பேசிக்கொண்டிருப்பது ஏன்? என்று கேள்வி எழுப்பினாா்.

இந்த விவகாரம் குறித்து விவாதிக்க பின்னா் அனுமதி அளிக்கிறேன் என்று பேரவைத் தலைவா் கூறியதை ஏற்க மறுத்த பாஜக உறுப்பினா்கள் ஒத்திவைப்பு தீா்மானத்திற்கு அனுமதி கோரி உரக்க பேசிக்கொண்டிருந்தனா். இதைத் தொடா்ந்து ஆளுங்கட்சி, எதிா்க்கட்சி உறுப்பினா்கள் இடையே வாக்குவாதம், கூச்சல் குழப்பம் ஏற்பட்டது.

அப்போது வருவாய்த் துறை அமைச்சா் கிருஷ்ணபைரே கௌடா, ‘முந்தைய பாஜக ஆட்சிக் காலத்தில் தான் வக்ஃப் பிரச்னைகள் ஏற்பட்டன. இந்த விவகாரத்தை முன்வைத்து அரசியல் செய்வதும், அவையின் நேரத்தை வீணடிப்பதும் தான் எதிா்க்கட்சிகளின் நோக்கம். பேரவைத் தலைவா் அனுமதி அளித்தால், வக்ஃப் சொத்து விவகாரம் குறித்து விவாதிக்க அரசு தயாராக இருக்கிறது. பாஜகவுக்கு விவாதம் தேவையில்லை. மாறாக, இந்த விவகாரத்தில் அரசியல் செய்வதே நோக்கம்’ என்றாா்.

மருத்துவக் கல்வித் துறை அமைச்சா் சரணபிரகாஷ் பாட்டீல் பேசுகையில், ‘12ஆம் நூற்றாண்டின் பசவண்ணரின் கொள்கைகளில் பாஜக, ஆா்.எஸ்.எஸ்க்கு அக்கறையில்லை’ என்றாா். இதற்கு பாஜக உறுப்பினா்கள் கடும் எதிா்ப்பு தெரிவித்தனா்.

அப்போது எத்ரிக்கட்சித் தலைவா் ஆா்.அசோக், ‘வக்ஃப் சொத்து தொடா்பான ஒத்திவைப்பு தீா்மானம் தொடா்பாக ஆரம்ப கருத்துகளை கூறுவதற்கு அனுமதிக்க வேண்டும்’ என்றாா்.

பேரவைத் தலைவா் யூ.டி.காதா்,‘வக்ஃப் சொத்துகள் தொடா்பாக விவாதம் நடத்த அரசு தயாராக உள்ளது. ஆனால், கேள்வி நேரத்திற்கு பிறகு விவாதத்தை எடுத்துக்கொள்ளலாம். ஒத்திவைப்பு தீா்மானத்திற்கு அனுமதி அளிக்கமுடியாது. என்றாா். இதற்கு எதிா்ப்பு தெரிவித்த பாஜக உறுப்பினா்கள், தொடா்ந்து ஒத்திவைப்பு தீா்மானத்திற்கு வலியுறுத்தினா்.

அப்போது பாஜக உறுப்பினா் பசனகௌடா பாட்டீல் யத்னல், செவ்வாய்க்கிழமை நடக்க இருக்கும் பஞ்சமசாலி லிங்காயத்து சமுதாயத்தின் இடஒதுக்கீட்டு போராட்டத்திற்கு பெலகாவி மாவட்ட நிா்வாகம் கடும் கட்டுப்பாடுகள் விதித்துள்ளது குறித்து பிரச்னையை கிளப்பினாா். இதற்கு அனுமதி அளிக்காத பேரவைத் தலைவா் தொடா்ந்து அனுபவ மண்டபம் குறித்து பேசினாா். அவரை தொடா்ந்து சட்டத் துறை அமைச்சா் எச்.கே.பாட்டீல் பேசுவதற்கு அனுமதித்தாா். இதனால் ஆத்திரமடைந்த பசனகௌடா பாட்டீல் யத்னல் உள்ளிட்ட பாஜக உறுப்பினா்கள் சிலா், பேரவைத் தலைவா் இருக்கை முன்பு திரண்டு, இந்த விவகாரம் குறித்து முதல்வா் பதிலளிக்க வேண்டும் என்று வலியுறுத்தினா்.

இது ஹிட்லா் ஆட்சி என்று பாஜக உறுப்பினா்கள் முழக்கமிட்டனா். இதைத் தொடா்ந்து இரு தரப்புக்கும் இடையே கடும் வாக்குவாதம் ஏற்பட்டு, அவையில் கூச்சல் குழப்பம் ஏற்பட்டது. எனவே, அவையை நண்பகல் 2 மணி வரை பேரவைத் தலைவா் ஒத்திவைத்தாா்.