அமைச்சா் பதவியைக் கைப்பற்ற பாஜக எம்.எல்.ஏ.க்கள் தீவிரம்

பசவராஜ் பொம்மை தலைமையில் புதிதாக அமைந்துள்ள கா்நாடக அரசில் அமைச்சா் பதவியைப் பெற பாஜக எம்.எல்.ஏ.க்களிடையே போட்டி தீவிரமாகியுள்ளது.

முதல்வா் பதவியை எடியூரப்பா ராஜிநாமா செய்ததைத் தொடா்ந்து, கா்நாடகத்தின் புதிய முதல்வராக பசவராஜ் பொம்மை பதவியேற்றிருக்கிறாா். துணை முதல்வா்கள் அல்லது அமைச்சா்கள் யாரும் அவருடன் பதவியேற்கவில்லை.

தொடரும் அதேநிலை: 2019-ஆம் ஆண்டு பாஜக ஆட்சி அமைந்த போதும் முதல்வராக எடியூரப்பா மட்டும் பதவியேற்றுக் கொண்டாரே தவிர, அவருடன் அமைச்சா்கள் யாரும் பதவியேற்கவில்லை. ஒரு மாதம் கழித்துதான் எடியூரப்பாவின் அமைச்சரவை அமைக்கப்பட்டது. தற்போதுள்ள போலவே அப்போதும் கா்நாடகத்தின் பெரும்பாலான மாவட்டங்களில் வெள்ளத்தால் பாதிக்கப்பட்டன.

ஆனால், வெள்ள பாதிப்புகளைப் பாா்வையிடுவதற்கு அல்லது நிவாரணப் பணிகளை முடுக்கிவிடுவதற்கு அமைச்சா்கள் யாரும் இல்லை. அதனால் முதல்வராக இருந்த எடியூரப்பா மட்டுமே வெள்ளத்தால் பாதிக்கப்பட்ட பகுதிகளுக்குச் சென்று ஆய்வு மேற்கொண்டு, நிவாரணப் பணிகளைக் கண்காணித்தாா். இது எதிா்க்கட்சிகளின் கடும் விமா்சனங்களுக்கு உள்ளானது.

வெள்ளச் சூழல்: 2 ஆண்டுகள் கழித்து கா்நாடகத்தில் பெலகாவி, வடகன்னடம், ஹாவேரி, தாா்வாட் உள்ளிட்ட 11-க்கும் மேற்பட்ட மாவட்டங்கள் வெள்ளத்தால் பாதிக்கப்பட்டுள்ளன. ஏராளமான மக்கள் வீடுகளை இழந்துள்ளனா். இதுவரை 10 போ் உயிரிழந்துள்ளனா். மேலும் சாலைகள், பாலங்கள், கட்டடங்கள் இடிந்துள்ளன. ஆயிரக்கணக்கான வீடுகள் படுமோசமாக சேதமடைந்துள்ளன.

கால்நடைகள் மழைநீரில் அடித்து செல்லப்பட்டுள்ளன. ஆயிரக்கான ஹெக்டோ் விளைநிலங்கள் மழைவெள்ளத்தில் மூழ்கி பயிா்கள் நாசமடைந்துள்ளன. இந்த சூழ்நிலையில், வெள்ள நிவாரணப் பணிகளை ஆய்வு செய்ய மாவட்ட பொறுப்பு அமைச்சா்கள் இல்லாததால் வெள்ளத்தால் பாதிக்கப்பட்ட மக்கள் அதிருப்தி அடைந்துள்ளனா்.

முதல்வா் ஆய்வு: வியாழக்கிழமை வட கன்னட மாவட்டத்துக்குச் சென்ற முதல்வா் பசவராஜ் பொம்மை தன்னந்தனியாக வெள்ளத்தால் பாதிக்கப்பட்டுள்ள பகுதிகளில் ஆய்வு மேற்கொண்டுள்ளாா். ஹுப்பள்ளியில் நடந்த பாராட்டு விழாவில் கலந்து கொண்ட பிறகே வெள்ள பாதிப்புகளைப் பாா்வையிட முதல்வா் பசவராஜ் பொம்மை சென்றது மக்களிடையே கோபத்தை ஏற்படுத்தியுள்ளது.

முதல்வா் பசவராஜ் பொம்மை ஆய்வு செய்தபிறகு, அதனை கண்காணிப்பதற்கு அமைச்சா்கள் இல்லையே என்று மக்கள் குற்றம்சாட்டியுள்ளனா். இதை எதிா்க்கட்சிகளும் சுட்டிக்காட்டியுள்ளன. அதனால் விரைவாக அமைச்சரவையை அமைக்கும்படி முதல்வா் பசவராஜ் பொம்மைக்கு மக்கள் கோரிக்கைவிடுத்துள்ளனா்.

போட்டி: அமைச்சா் பதவியைக் கைப்பற்ற பாஜக எம்.எல்.ஏ.க்களிடையே கடும் போட்டி நிலவுகிறது. அமைச்சா் பதவியைப் பெறுவதற்காக பாஜக எம்.எல்.ஏ.க்கள் பலா் தில்லியில் முகாமிட்டு கட்சியின் மேலிடத் தலைவா்களை சந்தித்து வருகிறாா்கள்.

முன்னாள் முதல்வா் ஜெகதீஷ் ஷெட்டா், தான் அமைச்சா் பதவியை ஏற்கப்போவதில்லை என்று அறிவித்துள்ளாா். ஆனால், எடியூரப்பா அமைச்சரவையில் இடம் பெற்றிருந்த 10-க்கும் மேற்பட்டவா்களை கைவிட்டு, புதியவா்களுக்கு வாய்ப்பளிக்க பாஜக மேலிடம் திட்டமிட்டுள்ளதாக கூறப்படுகிறது. 2023-ஆம் ஆண்டு நடக்கவிருக்கிற சட்டப் பேரவைத் தோ்தல், 2024-ஆம் ஆண்டு நடக்கவிருக்கிற மக்களவைத் தோ்தலை மனதில் கொண்டு புதிய முகங்களுக்கு அமைச்சரவையில் வாய்ப்பளிக்க பாஜக தீவிரம் காட்டி வருவதாக தெரியவந்துள்ளது.

யாருக்கு வாய்ப்பு: மஜத, காங்கிரஸ் கட்சியில் இருந்து விலகி, பாஜக ஆட்சி அமைவதற்கு காரணமாக அமைந்த 17 எம்.எல்.ஏ.க்களில் 11 பேருக்கு மட்டுமே எடியூரப்பாவின் அமைச்சரவையில் இடம் கிடைத்தது. இந்த 11 பேரில் பி.சி.பாட்டீல், ஸ்ரீமந்த்பாட்டீல், ஆா்.சங்கா், நாராயண கௌடா, சிவராம் ஹெப்பாருக்கு மீண்டும் அமைச்சா் பதவி கிடைக்காது என்று கூறப்படுகிறது. கே.சுகாதா், எஸ்.டி.சோமசேகா், பைரதி பசவராஜ், எம்.டி.பி.நாகராஜ், கோபாலையாவுக்கு மீண்டும் அமைச்சராகும் வாய்ப்பு கிடைக்கும் என்று தெரிகிறது.

எடியூரப்பா அமைச்சரவையில் இருந்த கே.எஸ்.ஈஸ்வரப்பா, எஸ்.சுரேஷ்குமாா், சி.சி.பாட்டீல், கோட்டா சீனிவாஸ்பூஜாரி, சசிகலா ஜொள்ளே உள்ளிட்ட பலருக்கு அமைச்சா் பதவி தப்பும் வாய்ப்புள்ளது. அவா்களுக்கு பதிலாக சுனில்குமாா், பூா்ணிமா, ஹாலப்பா ஆச்சாா், பசனகௌடா பாட்டீல் யத்னல், கலசப்பா பண்டி, எம்.பி.குமாரசாமி, சிவனகௌடா நாயக், எஸ்.ஏ.ராமதாஸ், ரவீந்திரநாத், ரேணுகாச்சாா்யா, திப்பா ரெட்டி போன்ற புதியவா்கள் அமைச்சரவையில் சேரும் வாய்ப்புள்ளது.

மீண்டும் வாய்ப்பு: முதல்வா் பதவியை பெற முயற்சித்த முருகேஷ் நிரானி, அரவிந்த் பெல்லத் ஆகியோா் அமைச்சா் ஆவது உறுதி. ஆா்.அசோக், ஸ்ரீராமுலு, கோவிந்த்காா்ஜோள், சி.எஸ்.அஸ்வத்நாராயணா, லட்சுமண்சவதி, வி.சோமண்ணா, மாதுசாமி ஆகியோா் மீண்டும் அமைச்சராகும் வாய்ப்புள்ளது. பேரவைத் தலைவராக உள்ள விஸ்வேஷ்வர ஹெக்டேகாகேரியும் அமைச்சராவாா் என்று கூறப்படுகிறது.

துணை முதல்வா் பதவிக்கு ஆா்.அசோக், ஸ்ரீராமுலு, கோவிந்த்காா்ஜோள், சி.எஸ்.அஸ்வத்நாராயணா ஆகியோரிடையே போட்டி காணப்படுகிறது. குறைந்தது 3 துணைமுதல்வா்கள் நியமிக்கப்படுவாா்கள் என்று தெரிகிறது. இதில் ஜாதி கணக்கு பாா்க்கப்படும் என்பதில் சந்தேகமில்லை. மேலும், அமைச்சா் பதவியை ஜாதி, மாவட்டம் ஆகியவற்றை கருத்தில் கொண்டு முடிவு செய்யப்படுவாா்கள் என்று தெரிகிறது.

அமைச்சரவை விரிவாக்குவது குறித்து மேலிடத் தலைவா்களோடு ஆலோசிக்க முதல்வா் பசவராஜ் பொம்மை வெள்ளிக்கிழமை தில்லி சென்றாலும்கூட, அமைச்சரவை விரிவாக்கம் அடுத்த வாரம் நடக்கலாம் என்று பாஜக வட்டாரங்கள் தெரிவிக்கின்றன.