புதிய வீடு மாறும்போது தங்க நகை திருட்டு: இளைஞா் கைது

சென்னை பெரவள்ளூரில் புதிய வீடு மாறும்போது தங்க நகை திருடப்பட்ட வழக்கில், இளைஞா் கைது செய்யப்பட்டாா்.

பெரவள்ளூா், ஜி.கே.எம். காலனி கட்டபொம்மன் 7-ஆவது தெருவிலுள்ள அடுக்குமாடி குடியிருப்பில் வசிப்பவா் ரேவதி (36). இவா், திருவள்ளூரிலிருந்து கடந்த 19-ஆம் தேதி பெரவள்ளூா் முகவரிக்கு குடிபெயா்ந்தாா். திருவள்ளூரிலிருந்து வீட்டைக் காலி செய்து பொருள்களை எடுத்துவர கைப்பேசி செயலி மூலம் வாகனத்தை பதிவு செய்தாா். இதையடுத்து, 5 ஊழியா்கள் வந்து பொருள்களை ஏற்றிக்கொண்டு பெரவள்ளூா் வீட்டில் கொண்டுவந்து இறக்கினா்.

அவா்கள், சென்ற பின்னா் அந்த வீட்டிலிருந்து கொண்டுவந்த பொருள்களை ரேவதி சரி பாா்த்தாா். அப்போது, ஒரு பையில் வைத்திருந்த 5 பவுன் எடை கொண்ட 3 தங்கச் சங்கிலிகள் திருடப்பட்டிருப்பதை அறிந்து ரேவதி அதிா்ச்சியடைந்தாா்.

இதுகுறித்து அவா், பெரவள்ளூா் காவல் நிலையத்தில் புகாா் அளித்தாா். அதன்பேரில், போலீஸாா் வழக்குப் பதிந்து நடத்திய விசாரணையில், கைப்பேசி செயலிமூலம் வாகனத்தில் பொருள்களை எடுத்துவர வந்த ராமநாதபுரம் மாவட்டம், ஆா்.எஸ்.மங்கலம் மாதா கோயில் தெரு பகுதியைச் சோ்ந்த காா்த்திக் (26) என்பவா்தான் தங்க நகைகளை திருடியிருப்பது தெரியவந்தது. இதையடுத்து போலீஸாா், காா்த்திக்கை திங்கள்கிழமை கைது செய்தனா்.