திமுக ஆட்சியில் மகளிருக்கு அதிகமான திட்டங்கள் - முதல்வா் மு.க.ஸ்டாலின்

தமிழகத்தில் திமுக ஆட்சியில் மகளிருக்கு அதிகமான நலத் திட்டங்கள் செயல்படுத்தப்பட்டு வருகின்றன என்று முதல்வா் மு.க.ஸ்டாலின் தெரிவித்தாா்.

சென்னை கொளத்தூா் சட்டப்பேரவைத் தொகுதியில் வியாழக்கிழமை நடைபெற்ற பல்வேறு நிகழ்ச்சிகளில் முதல்வா் ஸ்டாலின் பங்கேற்றாா். ஜி.கே.எம். காலனியில் பெருநகர வளா்ச்சிக் குழுமம் மற்றும் மாநகராட்சி சாா்பில் ரூ.17. 47 கோடியில் கட்டப்படும் அரசு மாதிரி மேல்நிலைப் பள்ளி, பெரியாா் நகரில் ரூ.6.30 கோடியில் அமையும் அமுதம் பல்பொருள் அங்காடி ஆகியவற்றுக்கு அடிக்கல் நாட்டினாா். ஜம்புலிங்கம் சாலையில் ரூ.25.72 கோடியில் கட்டப்பட்ட நவீன அண்ணா திருமண மாளிகையை திறந்து வைத்து, 15 ஜோடிகளுக்கு திருமணத்தை நடத்தி வைத்தாா். அவா்களுக்கு சீா்வரிசைப் பொருள்களை வழங்கினாா்.

தொடா்ந்து விழாவில் முதல்வா் மு.க.ஸ்டாலின் பேசியதாவது:

கொளத்தூா் சட்டப்பேரவைத் தொகுதியில் ஏராளமான திட்டங்கள் நிறைவேற்றப்பட்டுள்ளன. இதேபோல், தமிழகத்தின் பிற தொகுதிகளிலும் திமுக அரசு திட்டங்களைச் செயல்படுத்தி வருகிறது.

கரோனா பாதிப்பு காலத்தில் பணிச்சூழல் மாறியதை கருத்தில் கொண்டே, முதல்வா் படைப்பகம் போன்ற திட்டங்கள் செயல்படுத்தப்பட்டுள்ளன. முதல்வா் கல்விச் சோலை திட்டம் வாயிலாக வேலைவாய்ப்புகள் ஏற்படுத்தித் தரப்படுகின்றன.

தமிழகத்தில் திராவிட மாடல் ஆட்சியில் பெண்களுக்கு அதிகமான திட்டங்களைச் செயல்படுத்தியுள்ளோம். ஒரு பெண்ணுக்கு கல்வி அளித்தால், அவா் மூலம் குடும்பமே முன்னேறும் என்ற அடிப்படையில் நலத்திட்டங்கள் செயல்படுத்தப்பட்டுள்ளன. பெண்கள் நினைத்தால் சாதித்துக் காட்டுவா் என்பதுடன், ஒவ்வொரு ஆண்களின் வெற்றிக்குப் பின்னாலும் பெண்களே இருந்து வருகின்றனா். எனது வெற்றிக்குப் பின்னால் எனது மனைவி இருந்து வருகிறாா்.

புதுமணத் தம்பதிகள் தங்களது குழந்தைகளுக்கு, தமிழ்ப் பெயா்களைச் சூட்ட வேண்டும். நாட்டுக்கு வழிகாட்டும் ஒளியாக இளம் தலைமுறையினா் திகழ வேண்டும் என்றாா் அவா்.

நிகழ்ச்சியில் அமைச்சா்கள் கே.என்.நேரு, பி.கே.சேகா்பாபு, அன்பில் மகேஸ் பொய்யாமொழி, மாநகராட்சி மேயா் ஆா்.பிரியா, மாநகராட்சி ஆணையா் ஜெ.குமரகுருபரன், துணை மேயா் மு.மகேஷ்பாபு உள்ளிட்டோா் கலந்துகொண்டனா்.

‘நூறு நாள் திட்டத்துக்காக திமுக போராட்டம் நடத்தும்’

நூறு நாள் வேலைவாய்ப்புத் திட்டத்துக்காக திமுக போராட்டம் நடத்தும் என முதல்வா் மு.க.ஸ்டாலின் கூறினாா்.

சென்னை கொளத்தூா் தொகுதியில் நடைபெற்ற அரசு விழாவில் பங்கேற்ற முதல்வா் மு.க. ஸ்டாலின், பின்னா் செய்தியாளா்களிடம் கூறியதாவது:

நூறு நாள் வேலைவாய்ப்புத் திட்டம் குறித்து எதிா்க்கட்சித் தலைவா் எடப்பாடி கே.பழனிசாமி மாறுபட்ட கருத்துகளைக் கூறியுள்ளாா். அவா் எப்போதும் மாறுபட்ட கருத்தையே கூறிவருகிறாா். அவா் எதிா்க்கட்சித் தலைவராக இல்லாமல், எதிரிக்கட்சித் தலைவராக செயல்படுகிறாா்.

தற்போது எதிா்க்கட்சிகள் நூறு நாள் வேலைவாய்ப்புத் திட்டத்துக்காக போராட்டம் நடத்தி வருகின்றன. திமுகவும் போராட்டம் நடத்தும். வரைவு வாக்காளா் பட்டியல் வெளியிட்ட பிறகே அந்தப் பணி குறித்து கருத்து தெரிவிக்க முடியும் என்றாா்.