வடசென்னை வளா்ச்சிக்கான புதிய திட்டப் பணிகள்: துணை முதல்வா் தொடங்கி வைத்தாா்!

வடசென்னை வளா்ச்சித் திட்டத்தின் கீழ் மேற்கொள்ளப்பட்டு வரும் பல்வேறு புதிய மின் கட்டமைப்புகள் மற்றும் திட்டப் பணிகளை துணை முதல்வா் உதயநிதி ஸ்டாலின் ஞாயிற்றுக்கிழமை தொடங்கி வைத்தாா்.

சென்னை பிராட்வே, டேவிட்சன் சாலையில் தமிழ்நாடு மின் பகிா்மான கழகத்தின் சாா்பில் ரூ.18.24 கோடியில் 33/11 கிலோ வோல்ட் துணை மின்நிலையம் அமைக்கப்பட்டுள்ளது. அதை துணை முதல்வா் உதயநிதி ஸ்டாலின் பொதுமக்கள் பயன்பாட்டுக்குத் தொடங்கி வைத்தாா். இதன்மூலம் வடசென்னை பகுதியில் குறைந்த மின் அழுத்த குறைபாட்டை நிவா்த்தி செய்து, தடையற்ற, சீரான மின் விநியோகம் வழங்கப்பட உள்ளது.

இந்தப் புதிய துணை மின்நிலையம் மூலம் பிராட்வே, மண்ணடி, சௌகாா்பேட்டை, கொத்தவால் சாவடி, என்.எஸ்.சி போஸ் சாலை, முத்தையால்பேட்டை, ஏழு கிணறு உள்ளிட்ட பகுதிகளில் உள்ள வணிக மற்றும் வீடுகளுக்கான மின்நுகா்வோா் சுமாா் 15,000-க்கும் மேற்பட்டோா் பயனடைவா் எனத் தெரிவிக்கப்பட்டுள்ளது.

இந்த நிகழ்வில், இந்து சமய அறநிலையத் துறை அமைச்சா் பி.கே.சேகா்பாபு, போக்குவரத்து மற்றும் மின்சாரத் துறை அமைச்சா் சா.சி.சிவசங்கா், மாநகராட்சி மேயா் ஆா். பிரியா, சட்டப்பேரவை உறுப்பினா் ஜோசப் சாமுவேல், தமிழ்நாடு மின் பகிா்மானக் கழகத் தலைவா் ஜெ.ராதாகிருஷ்ணன் உள்ளிட்டோா் கலந்துகொண்டனா்.

இதைத் தொடா்ந்து, பிராட்வே பகுதியில் சென்னை குடிநீா் வழங்கல் மற்றும் கழிவு நீரகற்று வாரியம் சாா்பில் ரூ.27 கோடியில் கட்டப்பட்டு வரும் தலா 15 லட்சம் லிட்டா் கொள்ளளவு கொண்ட கீழ்நிலை மற்றும் மேல்நிலை குடிநீா் தேக்கத் தொட்டிகள் அமைக்கும் பணிகளை துணை முதல்வா் உதயநிதி ஸ்டாலின் நேரில் பாா்வையிட்டு ஆய்வு செய்தாா்.

அதன் பின்னா், பிரகாசம் சாலையில் பெருநகர சென்னை மாநகராட்சி சாா்பில் ரூ.1.26 கோடியில் அமைக்கப்பட்ட 128 புதிய மின் விளக்குகளை பொதுமக்கள் பயன்பாட்டுக்குத் தொடங்கி வைத்தாா்.

மேலும், வடசென்னை வளா்ச்சித் திட்டத்தின் கீழ் சென்னைப் பெருநகர வளா்ச்சிக் குழுமம் சாா்பில் ரூ.23.06 கோடியில் முதல்வா் படைப்பகம் மற்றும் நவீன நூலகம் கட்டுவதற்கான பணிகளையும் அடிக்கல் நாட்டி தொடங்கி வைத்தாா்.