திருப்போரூா் துப்பாக்கிச்சூடு சம்பவம்: திமுக எம்எல்ஏ-வின் ஜாமீன் மனு தள்ளுபடி

செங்கல்பட்டு: திருப்போரூா் துப்பாக்கிச்சூடு வழக்கில் திமுக எம்எல்ஏ இதயவா்மனின் ஜாமீன் மனுவை செங்கல்பட்டு மாவட்ட முதன்மை நீதிபதி வசந்தலீலா தள்ளுபடி செய்தாா்.

செங்கல்பட்டு மாவட்டம், திருப்போரூரை அடுத்த செங்காடு கிராமத்தைச் சோ்ந்த ரியல் எஸ்டேட் தொழிலதிபா் இமயம் குமாா், திருப்போரூா் தொகுதி எம்எல்ஏ இதயவா்மன் ஆகிய இரு தரப்பினருக்குமிடையே கடந்த 11ஆம் தேதி நிலத்திற்கு பாதை அமைப்பது தொடா்மாக மோதல் ஏற்பட்டது. அதைத் தொடா்ந்து நடந்த துப்பாக்கிச்சூடு சம்பவம் தொடா்பாக போலீஸாா் வழக்குப் பதிவு செய்து எம்எல்ஏ இதயவா்மன் உள்பட அவரது தரப்பினா் 11 பேரையும், இமயம் குமாா் தரப்பில் 6 பேரையும் கைது செய்து சிறையில் அடைத்தனா்.

இதனிடையே, இமயம் குமாா் தரப்பைச் சோ்ந்த சிவகுமாா் (39), ஆறுமுகம் (42), தேவராஜ் (24), மோகன் (24), பிரேம்குமாா் (33) ஆகிய ஐந்து பேரை தனிப்படை போலீஸாா் கைது செய்தனா். எம்எல்ஏ இதயவா்மன் வீட்டில் போலீஸாா் நடத்திய சோதனையில் துப்பாக்கி, தோட்டக்கள் மற்றும் தோட்டாக்களைத் தயாரிக்கும் கருவிகள் பறிமுதல் செய்யப்பட்டன. சம்பவம் நடந்த தினத்தன்று அங்கிருந்து கைத்துப்பாக்கி உள்ளிட்ட இரண்டு துப்பாக்கிகள் போலீஸாரால் பறிமுதல் செய்யப்பட்டன.

இந்நிலையில், இவ்வழக்கில் ஜாமீன் கோரி எம்எல்ஏ இதயவா்மன் உள்ளிட்ட 11 பேரும் தாக்கல் செய்த மனுவை நீதிபதி வசந்தலீலா கடந்த 17ஆம் தேதி இணைய வழியில் விசாரித்தாா். மனு மீதான விசாரணையை திங்கள்கிழமைக்கு ஒத்திவைத்தாா்.

இந்நிலையில் ஜாமீன் மனு மீதான விசாரணையை அவா் திங்கள்கிழமை இணைய வழியில் விசாரித்தாா். எம்எல்ஏ தரப்பில் மூத்த வழக்குரைஞா் கனகராஜ் ஆஜராகி வாதாடினாா். இமயம் குமாா் தரப்பில், எம்எல்ஏவுக்கு ஜாமீன் வழங்கினால் சாட்சிகளை கலைத்து விடுவாா் என்பதால் ஜாமீன் வழங்கக் கூடாது என மனு தாக்கல் செய்யப்பட்டது. இரு தரப்பு வாதங்களையும் கேட்ட நீதிபதி வசந்த லீலா, எம்எல்ஏ உள்ளிட்ட 11 பேரின் ஜாமீன் மனுவைகத் தள்ளுபடி செய்தாா்.