சென்னை வந்த விமானத்தில் ரூ.22 லட்சம் தங்கம் பறிமுதல்

பக்ரைனில் இருந்து சென்னை வந்த விமானத்தில் கடத்தி வரப்பட்ட ரூ.22 லட்சம் தங்கம் பறிமுதல் செய்யப்பட்டது.
பக்ரைனில் இருந்து திங்கள்கிழமை அதிகாலை சென்னைக்கு வந்த விமானத்தில் பயணிகளின் உடைமைகளை சுங்கத் துறை அதிகாரிகள் சோதனையிட்டனர். அப்போது சுங்கத் துறை எல்லையைத் தாண்டி வேகமாகக் கடந்து சென்ற பயணியை அதிகாரிகள் மடக்கி விசாரணை மேற்கொண்டனர். அவர் வைத்திருந்த சூட்கேசை சோதனையிட்டதில், ஒரு அட்டை பெட்டி இருந்தது. அதனுள் அலுமினியம் ஷீட்டில் மறைத்து வைக்கப்பட்டிருந்த 700 கிராம் தங்கம் பறிமுதல் செய்யப்பட்டது. இதன் மதிப்பு ரூ.22 லட்சம் ஆகும். இதைக் கடத்தி வந்த பயணியான சென்னையைச் சேர்ந்த ஹைடுரூஸிடம் (34) அதிகாரிகளின் விசாரணை நடத்தி வருகின்றனர்.