ரூ.66 லட்சம் மதிப்புள்ள 2.1 கிலோ தங்கம் பறிமுதல்

வெளிநாட்டிலிருந்து சென்னைக்கு கடத்தி வந்த ரூ.66.7 லட்சம் மதிப்புள்ள 2.1 கிலோ தங்கத்தை சென்னை விமான நிலையத்தில் சுங்க அதிகாரிகள் பறிமுதல் செய்தனர்.
இதுதொடர்பாக சென்னை விமான நிலைய சுங்கத் துறை அதிகாரிகள் வெளியிட்டுள்ள அறிக்கை: திங்கள்கிழமை மேற்கொண்ட தொடர் சோதனையின்போது, 4 பேர் சவுதி அரேபியா, துபை ஆகிய நாடுகளிலிருந்து ரூ.66.7 லட்சம் மதிப்புள்ள 2.1 கிலோ தங்கம் பறிமுதல் செய்யப்பட்டது. சவுதி அரேபியாவிலிருந்து சென்னை வந்த மஹபுல் ஷேக் (31) என்பவரிடம் இருந்து ரூ. 14.7 லட்சம் மதிப்புள்ள 464 கிராம் தங்கப்பட்டைகளும், துபையிலிருந்து வந்த அஸ்மத் பாஷா (34), முகமது பரூக் (38), நூர் முகமது (47) ஆகிய 3 பேரிடமிருந்து ரூ,30 லட்சம் மதிப்புள்ள 968 கிராம் தங்கக்கட்டிகள், பட்டைகள் பறிமுதல் செய்யப்பட்டன. ஞாயிற்றுக்கிழமை மேற்கொண்ட சோதனையில் கேட்பாரற்றுக் கிடந்த ஒரு பார்சலில் ரூ.22 லட்சம் மதிப்புள்ள 700 கிராம் தங்கக் கட்டிகள் பறிமுதல் செய்யப்பட்டன.

சென்னை விமான நிலையத்தில் சுங்கத் துறையினரால் பறிமுதல் செய்யப்பட்ட ரூ.66.7 லட்சம் மதிப்பிலான தங்கம்.