மத்திய அரசின் திட்டங்களால் தமிழக துறைமுகங்கள் வளா்ச்சி: மத்திய அமைச்சா் சா்வானந்த சோனோவால்

திருவொற்றியூா்: மத்திய அரசின் சிறப்புத் திட்டங்களால் கடந்த 10 ஆண்டுகளில் தமிழகத்தின் பெருந்துறைமுகங்கள் மிகப்பெரிய வளா்ச்சியை எட்டியுள்ளதாக மத்திய துறைமுகங்கள் மற்றும் கப்பல் போக்குவரத்துத் துறை அமைச்சா் சா்வானந்த சோனோவால் தெரிவித்தாா்.

சென்னையில் மத்திய அமைச்சா் சா்வானந்த சோனோவால் செய்தியாளா்களிடம் செவ்வாய்க்கிழமை கூறியதாவது:

3 பெரிய துறைமுகங்கள் அமைந்துள்ள ஒரே மாநிலம் தமிழ்நாடுதான். சாகா்மாலா, பாரத்மாலா, பிரதமரின் விரைவு சக்தி பெருந்திட்டம் போன்றவை மூலம் தமிழ்நாட்டில் பெருந்துறைமுகங்களின் வளா்ச்சியில் மத்திய அரசு சிறப்பு கவனம் செலுத்தி வருகிறது. 2014-ஆம் ஆண்டு முதல் இத்துறைமுகங்களில் 45-க்கும் மேற்பட்ட திட்டங்கள் சுமாா் ரூ.16,000 கோடியில் செயல்படுத்தப்பட்டுள்ளன. சாகா்மாலா திட்டத்தின் கீழ் தமிழகத்தில் மட்டும் ரூ.94,000-ம் கோடியில் பல்வேறு வளா்ச்சித் திட்டங்கள் செயல்படுத்தப்பட்டு வருகின்றன.

கடந்த 10 ஆண்டுகளில் தமிழகத்தின் 3 பெருந்துறைமுகங்களின் சரக்கு கையாளும் திறன் ஆண்டுக்கு 167 மில்லியன் டன்னிலிருந்து 338 மில்லியன் டன்னாக அதிகரித்துள்ளது. புதன்கிழமை தூத்துக்குடியில் நடைபெற உள்ள நிகழ்ச்சியில் பிரதமா் மோடி ரூ.17 ஆயிரம் கோடி மதிப்பீட்டிலான 36 முக்கிய திட்டங்களை தொடங்கி வைக்கவும், அடிக்கல் நாட்டவுள்ளாா்.

தூத்துக்குடி வ.உ.சி. துறைமுகத்தில் ரூ. 7,056 கோடி மதிப்பில் வெளி துறைமுக சா்வதேச சரக்குப் பெட்டக முனையத் திட்டத்துக்கு பிரதமா் மோடி புதன்கிழமை அடிக்கல் நாட்டுகிறாா். இதன் மூலம் நாட்டின் கிழக்கு கடற்கரையில் மிகப் பெரிய கப்பல் போக்குவரத்து மையமாக வ.உ.சி. துறைமுகம் மாறும்.

ஹைட்ரஜன் எரிவாயு உற்பத்தி மையம்:

பசுமை எரிசக்தி திட்டங்களை ஊக்குவிக்கும் வகையில் தூத்துக்குடி, பாரதீப், கண்டலா ஆகிய மூன்று துறைமுகங்களில் ஹைட்ரஜன் எரிவாயு உற்பத்தி மையங்களை அமைப்பதற்கு மத்திய அரசு முடிவு செய்துள்ளது. நாட்டிலேயே முதல் முதலாக தூத்துக்குடியில் ஹைட்ரஜன் எரிவாயு உற்பத்தி மையத்தை அமைப்பதற்கான திட்டத்துக்கு பிரதமா் மோடி அடிக்கல் நாட்டுகிறாா். ஹைட்ரஜன் எரிவாயு மூலம் இயக்கப்படும் முதல் கப்பல் போக்குவரத்து புதன்கிழமை தூத்துக்குடியில் தொடங்கப்படுகிறது என்றாா் அவா்.

இச்சந்திப்பின்போது துறைமுகங்கள் மற்றும் கப்பல் போக்குவரத்துத் துறை இணையமைச்சா் சாந்தனு தாக்கூா், துறையின் செயலா் டி.கே. ராமச்சந்திரன், இணைச் செயலா் பூஷன் குமாா், சென்னை காமராஜா் துறைமுகத்தின் மேலாண் இயக்குநா் ஐரின் சிந்தியா உள்ளிட்டோா் உடனிருந்தனா்.