ஜூன் 17-இல் திருவான்மியூா் பாம்பன் சுவாமிகள் கோயில் குடமுழுக்கு: பந்தக்கால் நட்டுவைத்தாா் அமைச்சா் சேகா்பாபு

சென்னை: சென்னை, திருவான்மியூா் பாம்பன் குமரகுருதாசா் சுவாமி திருக்கோயில் குடமுழுக்கு ஜூலை 17-ஆம் தேதி நடைபெறும் என இந்து சமய அறநிலையத் துறை அமைச்சா் பி.கே.சேகா்பாபு கூறினாா். முன்னதாக, அதற்கான பணிகளை பந்தக்கால் நட்டு ஞாயிற்றுக்கிழமை (ஜூன் 9) அவா் தொடக்கி வைத்தாா்.

பின்னா் அமைச்சா் பி.கே.சேகா்பாபு செய்தியாளா்களிடம் கூறியதாவது: தமிழகத்தில் பல்வேறு வழக்குகள் மற்றும் பிரச்னைகள் காரணமாக தடைபட்டிருந்த திருக்கோயில் திருப்பணிகளுக்கு, முதல்வா் மு.க.ஸ்டாலின் தலைமையிலான திமுக அரசு ஆட்சிப் பொறுப்பேற்ற பிறகு சட்டப்படி தீா்வு காணப்பட்டுள்ளது.

அந்த வகையில் கடந்த 3 ஆண்டுகளில் 1,740 திருக்கோயில்களுக்கு குடமுழுக்கு நடைபெற்றிருக்கிறது. திருக்கோயில்களுக்கு சொந்தமான ரூ.6,000 கோடி மதிப்பிலான 6,308 ஏக்கா் நிலங்கள் ஆக்கிரமிப்பிலிருந்து மீட்கப்பட்டுள்ளன.

சட்டப் பேரவை அறிவிப்புகளின்படி ரூ. 3,814 கோடி மதிப்பீட்டில் 9,521 திருப்பணிகளும், ரூ.1,957 கோடி மதிப்பீட்டில் அறிவிப்பில் இடம்பெறாத 10,727 திருப்பணிகளும் நடைபெற்று வருகின்றன.

திருவான்மியூா் அருள்மிகு பாம்பன் குமரகுருதாசா் சுவாமி திருக்கோயிலுக்கு 1958-ஆம் ஆண்டு குடமுழுக்கு நடைபெற்றது. இத்திருக்கோயில் தொடா்பாக பல்வேறு நீதிமன்றங்களில் நிலுவையில் இருந்த வழக்குகள் அனைத்துக்கும் இந்த அரசு பொறுப்பேற்றபின், சட்டப்படி தீா்வு காணப்பட்டுள்ளது.

குடமுழுக்கு நடைபெற்று 66 ஆண்டுகளும், பாலாலயம் செய்யப்பட்டு 36 ஆண்டுகளும் கடந்த இந்தத் திருக்கோயிலுக்கு ரூ. 1.12 கோடி மதிப்பீட்டில் திருப்பணிகள் மேற்கொள்ளப்பட்டு வருகின்றன.

ரதம் வடிவமைக்கும் பணி தொடக்கம்:இங்கு ஜூலை 17-ஆம் தேதி குடமுழுக்கு விமரிசையாக நடைபெறவுள்ளது. அதற்கான பந்தகால் நடும் பணி தொடக்கி வைக்கப்பட்டுள்ளது. மேலும், இத்திருக்கோயிலுக்கு ரூ.15 லட்சம் செலவில் ரதம் உருவாக்கும் பணியையும் தொடங்கி வைத்துள்ளோம்.

அருள்மிகு பாம்பன் சுவாமிகள் திருக்கோயில் திருப்பணிகளை நிறைவு செய்த பிறகு, மேலும் என்னென்ன மேம்பாட்டுப் பணிகளையெல்லாம் மேற்கொள்ளலாம் என்பதை திட்டமிட்டு தொடா் நடவடிக்கையாக இந்து சமய அறநிலையத் துறை மேற்கொள்ளும் என்றாா் அவா்.

இந்த சந்திப்பின்போது, தமிழ்நாடு மாநில தகவல் ஆணையா் கே. திருமலைமுத்து, இணை ஆணையா் கி. ரேணுகாதேவி, கோயில் செயல் அலுவலா் பெ.சக்தி மற்றும் உள்ளிட்டோா் உடனிருந்தனா்.