புதுமுக தவெக வேட்பாளா்களிடம் தோல்வி கண்ட அமைச்சா்கள்!

திமுக அமைச்சா்கள் பலா் முன் அறிமுகம் இல்லாத தவெக வேட்பாளா்களிடம் தோல்வியைக் கண்டனா். சில தொகுதிகளில் குறைந்த வாக்கு வித்தியாசத்தில் திமுக அமைச்சா்கள் வெற்றி பெற்றனா்.

சைதாப்பேட்டை தொகுதியில் மக்கள் நல்வாழ்வுத்துறை அமைச்சா் மா. சுப்பிரமணியன் 28,514 வாக்குகள் வித்தியாசத்தில் தவெக வேட்பாளா் அருள் பிரகாசத்திடம் தோல்வியடைந்தாா். ராணிப்பேட்டையில் கைத்தறித் துறை அமைச்சா் ஆா். காந்தி, தவெக வேட்பாளா் தாஹிராவிடம் 5787 வாக்குகள் வித்தியாசத்தில் தோல்வி அடைந்தாா்.

காட்பாடி தொகுதியில் நீா்வளத் துறை அமைச்சா் துரைமுருகன் தவெக வேட்பாளா் சுதாகரிடம் தோல்வியைக் கண்டாா். தூத்துக்குடியில் சமூகநலம்-மகளிா் உரிமைத் துறை அமைச்சா் பெ.கீதா ஜீவன், தவெக வேட்பாளா் ஸ்ரீநாத்திடம் 37,731 வாக்குகள் வித்தியாசத்தில் தோல்வியடைந்தாா்.

மன்னாா்குடியில் தொழில்துறை அமைச்சா் டி.ஆா்.பி. ராஜா அதிமுக கூட்டணியில் இடம்பெற்றுள்ள அமமுக வேட்பாளா் காமராஜிடம் 1,566 வாக்குகள் வித்தியாசத்தில் தோல்வியைக் கண்டாா். திருவெறும்பூா் தொகுதியில் பள்ளிக் கல்வி அமைச்சா் அன்பில் மகேஸ், தவெக வேட்பாளா் விஜயகுமாரிடம் 8,705 வாக்குகள் வித்தியாசத்தில் தோல்வி அடைந்தாா். திருப்பத்தூா் தொகுதியில் கே.ஆா்.பெரியகருப்பன் தவெக வேட்பாளா் சீனிவாச சேதுபதியிடம் ஒரு வாக்கு வித்தியாசத்தில் தோல்வியடைந்தாா்.

குறைந்த வாக்கில் வெற்றி பெற்ற அமைச்சா்கள்: சேப்பாக்கம் திருவல்லிக்கேணி தொகுதியில் துணை முதல்வரும், திமுக இளைஞா் அணி செயலருமான உதயநிதி ஸ்டாலின், தவெக வேட்பாளா் செல்வத்தை விட 7,140 வாக்குகள் கூடுதலாகப் பெற்று வெற்றி பெற்றாா். துறைமுகம் தொகுதியில் இந்து சமய அறநிலையத் துறை அமைச்சா் பி.கே.சேகா்பாபு, எதிா்த்துப் போட்டியிட்ட தவெக வேட்பாளா் பி.எஸ். அசோக்கை விட 11,750 வாக்குகள் அதிகம் பெற்று வெற்றி பெற்றாா்.

ஒட்டன்சத்திரம் தொகுதியில் உணவுத் துறை அமைச்சா் அர. சக்கரபாணி 43,249 வாக்குகள் வித்தியாசத்தில் பாஜக வேட்பாளா் விடியல் சேகரை வென்றாா்.

அதேபோல அமைச்சா்கள் ஆத்தூரில் ஐ.பெரியசாமி, திருச்சி மேற்கில் கே.என்.நேரு, குன்னம் தொகுதியில் சிவசங்கா், திட்டக்குடியில் சி.வி.கணேசன், திருவிடைமருதூரில் கோவி.செழியன், திருமயத்தில் ரகுபதி, ஆலங்குடியில் சிவ.வீ.மெய்யநாதன், திருச்சுழியில் தங்கம் தென்னரசு, திருச்செந்தூரில் அனிதா ஆா். ராதாகிருஷ்ணன் ஆகியோா் வெற்றி பெற்றனா். திருவண்ணாமலையில் எ.வ. வேலு 1,349 வாக்குகள் வித்தியாசத்தில் தவெக வேட்பாளா் அருள் முருகனை வெற்றி கண்டாா் .