மீனவர்கள் கோஷ்டி மோதல்: 16 பேர் மீது வழக்குப் பதிவு

மாமல்லபுரம் அருகே மீனவர்களுக்குள் ஏற்பட்ட மோதலைத் தொடர்ந்து 16 பேர் மீது போலீஸார் வழக்குப் பதிவு செய்தனர்.

மாமல்லபுரம் அருகே பட்டிபுலம் மீனவர் குப்பத்தைச் சேர்ந்த ஊராட்சித் துணைத் தலைவர் சேகர். இவரும், அதே பகுதியைச் சேர்ந்த சரவணனும் மீனவர்கள். இந்த இருவர் கோஷ்டிக்கும் இடையே முறை வைத்து மீன் பிடிப்பதில் அடிக்கடி தகராறு ஏற்பட்டது. இந்த நிலையில் வியாழக்கிழமை இரவு இரு பிரிவினருக்கும் இடையே மோதல் ஏற்பட்டது. இதில் சரவணன் மனைவி தீபா, அவரது உறவினர் கலையரசி ஆகியோர் பலத்த காயமடைந்து செங்கல்பட்டு அரசு மருத்துவமனையில் அனுமதிக்கப்பட்டனர்.

இது தொடர்பாக மாமல்லபுரம் காவல் நிலையத்தில் இருதரப்பினரும் புகார் மனு அளித்தனர். இதுதொடர்பாக காவல் ஆய்வாளர் கோவிந்தசாமி விசாரணை நடத்தினார். இதில் சேகர் தரப்பில் அவர் உள்பட 10 பேர் மீதும், சரவணன் தரப்பில் அவர் உள்பட 6 பேர் மீதும் வழக்குப் பதிவு செய்யப்பட்டது. இதனால் அந்த பகுதி மீனவர்கள் சனிக்கிழமை மீன் பிடிக்க கடலுக்கு செல்லாமல் வேலை நிறுத்தத்தில் ஈடுபட்டனர்.