உத்தரமேரூரில் கிடைத்த நகைகள் அரசுக் கருவூலத்தில் ஒப்படைப்பு: காஞ்சிபுரம் கோட்டாட்சியா் தகவல்

காஞ்சிபுரம்: காஞ்சிபுரம் அருகேயுள்ள குழம்பேஸ்வரா் கோயில் திருப்பணியின்போது கிடைத்த தங்க நகைகள் அனைத்தும் அரசுக் கருவூலத்தில் ஒப்படைக்கப்பட்டிருப்பதாக கோட்டாட்சியா் சி.வித்யா தெரிவித்தாா்.

காஞ்சிபுரம் மாவட்டம் உத்தரமேரூரில் மிகவும் பழமையான கும்பேஸ்வரா் கோயில் அமைந்துள்ளது. இக்கோயிலுக்கு மகா கும்பாபிஷேகம் நடத்த கிராம மக்கள் முடிவு செய்து திருப்பணிகளை ஞாயிற்றுக்கிழமை தொடங்கியபோது, கோயில் கருவறை அருகில் தங்கப் புதையல் கிடைத்தது. அதில் இறைவனுக்கு அணிவிக்கப்படும் தங்க ஆபரணங்கள் மற்றும் தங்க நாணயங்கள் ஆகியவை இருந்தன.

இத்தகவலறிந்து வருவாய்த் துறையினா் அங்கு சென்று புதையலாக கிடைத்த பொருள்கள் அனைத்தும் அரசுக்கே சொந்தம் என்று கூறி அரசிடம் ஒப்படைக்குமாறு கேட்டுக் கொண்டதற்கு கிராம மக்கள் எதிா்ப்பு தெரிவித்தனா். எனினும், காவல்துறையினரின் உதவியுடன் தங்க ஆபரணங்கள் உள்ளிட்டவற்றைப் பறிமுதல் செய்து ஒரு பெட்டியில் வைத்து பூட்டி சீல் வைத்து எடுத்துச் சென்றனா்.

இது குறித்து காஞ்சிபுரம் கோட்டாட்சியா் சி.வித்யா கூறியது:

உத்தரமேரூரில் உள்ள குழம்பேஸ்வரா் கோயில் மிகவும் தொன்மையான சிவன் கோயிலாகும். இக்கோயில் திருப்பணியின்போது மொத்தம் 560 கிராம் எடையுள்ள தங்க நகைகள் கிடைத்துள்ளன. இதில் சிவனின் சடையில் அணிவிக்கப்படும் தங்க வில்லைகள் சிறியவை-23, பெரியவை- 7 இருந்தன. ஒரு ஒட்டியாணம், சிறு தங்க குண்டுமணிகள்-29, உடைந்த ஆபரணத் துண்டு-1, சிவன் பிறை-1, மகாலஷ்மி டாலா்-1, தங்கத் தகடுகள்-3 ஆகியவை இருந்தன. இவை எதுவும் மதிப்பிடப்படவில்லை.

இந்த ஆபரணங்கள் அனைத்தும் செம்பு கலக்காத சுத்தத் தங்கமாக இருக்கலாம் என்று தெரிகிறது. உத்தரமேரூா் வட்டாட்சியா் மூலம் நகைகள் பற்றிய விவரங்கள் மாவட்ட ஆட்சியருக்கு தெரிவிக்கப்பட்டுள்ளது. ஆட்சியா் இந்த விவரங்களை அரசின் தொல்லியல் துறைக்கு தெரிவிப்பாா். தொல்லியல் துறையினா் வந்து பாா்த்த பிறகே ஆபரணங்கள் எந்த ஆண்டைச் சோ்ந்தவரை என்பதும், நகைகள் பற்றிய மற்ற விவரங்களும் தெரிய வரும். புதையலாக கிடைத்த தங்க நகைகள் அனைத்தும் அரசுக் கருவூலத்தில் ஒப்படைக்கப்பட்டுள்ளன என்றாா் அவா்.