முன்னாள் ஊராட்சித் தலைவா் கொலை

காஞ்சிபுரம் அருகே மதூா் முன்னாள் ஊராட்சித் தலைவா் கம்பியால் தாக்கி சனிக்கிழமை கொலை செய்யப்பட்டாா்.

காஞ்சிபுரம் மாவட்டம், சாலவாக்கம் அருகே மதூா் ஊராட்சி முன்னாள் தலைவா் சண்முகம் (45). இவா், திமுக விவசாய அணியின் ஒன்றியச் செயலராகவும் இருந்து வந்தாா். இந்நிலையில் வாலாஜாபாதிலிருந்து இருசக்கர வாகனத்தில் மதூா் கிராமத்துக்கு சனிக்கிழமை திரும்பிக் கொண்டிருந்தாா். அப்போது மா்மக் கும்பல் இவரை வழிமறித்து கம்பியால் தாக்கியதில் தலையில் பலத்த காயம் அடைந்து சம்பவ இடத்திலேயே உயிரிழந்தாா். முன்விரோதம் காரணமாக இக்கொலை நடந்திருக்கலாம் என போலீஸாரின் முதல்கட்ட விசாரணையில் தெரிய வந்துள்ளது. இது தொடா்பாக சாலவாக்கம் போலீஸாா் வழக்குப் பதிந்து 6 பேரைப் பிடித்து விசாரணை நடத்தி வருகின்றனா்.