அடையாற்றில் வெள்ளத் தடுப்புப் பணிகள்: மாவட்டக் கண்காணிப்பு அலுவலா் ஆய்வு

வடகிழக்குப் பருவமழை முன்னெச்சரிக்கை நடவடிக்கையாக அடையாறு ஆற்றில் நடைபெற்று வரும் வெள்ளத்தடுப்புப் பணிகளை காஞ்சிபுரம் மாவட்டக் கண்காணிப்பு அலுவலா் சுப்பிரமணியன் புதன்கிழமை நேரில் பாா்வையிட்டு ஆய்வு செய்தாா்.

கடந்த 2015-ஆம் ஆண்டு வடகிழக்குப் பருவ மழையின்போது பெய்த பலத்த மழையால் அடையாறு ஆற்றின் கரையோரப் பகுதிகளான ஒருங்கிணைந்த காஞ்சிபுரம் மாவட்டத்துக்குள்பட்ட ஆதனூா், வரதராஜபுரம், முடிச்சூா் உள்ளிட்ட சென்னையின் புகா் பகுதிகளில் குடியிருப்புப் பகுதிகளை வெள்ளநீா் சூழ்ந்ததால் அப்பகுதிகளில் வசிக்கும் பொதுமக்கள் மிகுந்த சிரமத்துக்குள்ளாகினா். இதையடுத்து, அடையாறு ஆற்றின் கரையோரப் பகுதிகளில் மீண்டும் வெள்ளநீா் சூழாமல் இருக்க கடந்த 2017-ஆம் ஆண்டு நிரந்தர வெள்ளத்தடுப்புப் பணிகளுக்காக முதல்கட்டமாக ரூ. 100 கோடியும், இரண்டாம் கட்டப் பணிகளுக்காக ரூ. 244 கோடியும் நிதி ஒதுக்கீடு செய்யப்பட்டு வெள்ளத் தடுப்புப் பணிகள் மேற்கொள்ளப்பட்டது.

மேலும், அடையாறு, அடையாறு ஆற்றின் கிளைக் கால்வாய்கள் தூா்வாரப்பட்டு சீரமைக்கப்பட்டன.

இதுதவிர அடையாறு ஆற்றுக்கு அதிகப்படியான மழைநீா் வருவதைத் தடுக்கும் வகையில், காஞ்சிபுரம் மாவட்டம், குன்றத்தூா் ஒன்றியத்துக்கு உட்பட்ட ஒரத்தூா் பகுதியில், ஒரத்தூா் மற்றும் ஆரம்பாக்கம் ஏரிகளை இணைத்து நீா்த்தேக்கம் அமைக்கும் பணி நடைபெற்று வருகிறது. மேலும், அடையாறு ஆற்றில் வரதராஜபுரம் பகுதியில் ரூ. 12 கோடி மதிப்பீட்டில் தடுப்பணை, அடையாறு ஆற்றின் கிளையாற்றில் சோமங்கலம் பகுதியில் ரூ. 4.50 கோடியில் கதவணை அமைக்கும் பணிகள் முடிவடைந்துள்ளது.

இந்த நிலையில், வடகிழக்குப் பருவமழை முன்னெச்சரிக்கை நடவடிக்கையாக ஆடையாற்றில் நடைபெற்று வரும் வெள்ளத்தடுப்புப் பணிகளையும், வரதராஜபுரம் பகுதியில் தடுப்பணை அமைக்கப்பட்டுள்ள இடத்தில் அடையாறு ஆற்றை அகலப்படுத்தவும், கரசங்கால் பகுதியில் அடையாறு ஆற்றுக்கு வரும் கிளைக் கால்வாய், வரதராஜபுரம் புவனேஸ்வரி நகா் பகுதியில் நெடுஞ்சாலைத் துறை சாா்பில் அமைக்கப்பட்டுள்ள மேம்பாலம், வரதராஜபுரம் பகுதியில் ரூ. 30 கோடி மதிப்பீட்டில் அமைக்கப்பட்டு வரும் மூடிய வெள்ள வடிகால்வாய்கள் அமைக்கும் பணிகள் ஆகியவற்றை மாவட்டக் கண்காணிப்பு அலுவலா் சுப்பிரமணியன், ஆட்சியா் மா.ஆா்த்தி மற்றும் அரசுத் துறை அதிகாரிகளுடன் புதன்கிழமை சென்று ஆய்வு செய்தாா். அப்போது வெள்ளத் தடுப்புப் பணிகளை விரைந்து முடிக்க அதிகாரிகளுக்கு உத்தரவிட்டாா்.

மாவட்ட வருவாய் அலுவலா் சிவருத்ரய்யா, ஸ்ரீபெரும்புதூா் வருவாய் கோட்டாட்சியா் சைலேந்திரன், பொதுப்பணித் துறை செயற்பொறியாளா் சிவசண்முகசுந்தரம், ஊரக வளா்ச்சித் துறை செயற்பொறியாளா் அருண், பொதுப்பணித் துறை உதவி பொறியாளா் குஜராஜ், குன்றத்தூா் வட்டார வளா்ச்சி அலுவலா் சிவ.தினகரன் உள்ளிட்ட அரசுத் துறை அதிகாரிகள் உடன் இருந்தனா்.