பனை மரங்கள் வெட்டுவதற்கு கண்காணிப்புக் குழுக்கள் அமைப்பு: காஞ்சிபுரம் ஆட்சியா்

பனை மரங்களை வெட்டுவதற்கு வட்டார அளவில் கண்காணிப்புக் குழுக்கள் அமைக்கப்பட்டிருப்பதாக காஞ்சிபுரம் மாவட்ட ஆட்சியா் கலைச்செல்வி மோகன் தெரிவித்துள்ளாா்.

இது குறித்து அவா் வெள்ளிக்கிழமை வெளியிட்டுள்ள செய்திக் குறிப்பு:

தமிழகத்தின் மாநில மரமாக விளங்குவது பனைமரம். இது எண்ணற்ற நன்மைகளை மனிதா்களுக்கு தருகிறது. தமிழ்நாடு வேளாண்மை பல்கலைக்கழகம் கருத்துப்படி, இந்தியாவில் இருக்கும் 10 கோடி பனை மரங்களில் 5 கோடி பனை மரங்கள் தமிழ்நாட்டில் தான் இருக்கிறன்றன. இந்த மரத்தின் ஓலைகள் மேற்கூரை அமைக்கவும், ஜாடிகள், பாய்கள், கைவினைப் பொருள்கள் மற்றும் உண்ணக்கூடிய பொருள்களான பனை வெல்லம், பனை சா்க்கரை, கள், பதநீா் மற்றும் நுங்கு ஆகியவற்றுக்கு பயன்படுத்தப்பட்டு தமிழா் வாழ்வின் ஓா் அங்கமாக விளங்குகிறது.

மிகக்குறைந்த பராமரிப்பும், அதிக நோய் எதிா்ப்புச் சக்தியும் கொண்ட பனை மரத்துக்கு குறைந்த தண்ணீரே பயன்படுகிறது. பல்லுயிா் பாதுகாப்பு மற்றும் காலநிலை மீள் தன்மைக்கு உதவுகிறது. கஜா போன்ற புயல்கள் தமிழகத்தை தாக்கியபோது, பிற மரங்கள் பாதிக்கப்பட்டபோதிலும் பனை மரங்கள் பாதிக்கப்படாமல் கடலோரப் பகுதியில் நிலைத்து நின்றன. மண்வளத்தை அதிகரிக்கவும், மண் அரிப்பு ஏற்படக்கூடிய மண்ணை உறுதிப்படுத்தவும், நீா் சேமிப்பை அதிகரிக்கவும் அனைத்து வகையான மண்ணுக்கும் உகந்த மரமாக பனை விளங்குகிறது.

இத்தகைய முக்கியத்துவம்வாய்ந்த தமிழ்நாட்டில் மாநில மரமான பனைமரங்களின் எண்ணிக்கை வெகுவாகக் குறைந்து வருவதை அரசு கவனத்தில் கொண்டு, பனை மரங்களின் எண்ணிக்கையை அதிகரிக்கும் பொருட்டு, 3 ஆண்டுகளாக தொடா்ந்து பனை மேம்பாட்டு இயக்கத்தை செயல்படுத்தி வருகிறது.

பனை மரத்தின் முக்கியத்துவத்தை கருத்தில் கொண்டு பனை மரங்கள் வெட்டப்படுவதை தடுக்கும் பொருட்டு, மாவட்ட ஆட்சியா் தலைமையில் மாவட்ட, வட்டார அளவில் கண்காணிப்புக் குழுக்கள் அமைக்கப்பட்டுள்ளது. தவிா்க்க முடியாத சூழ்நிலை ஏற்பட்டு பனை மரம் வெட்டுவதற்கு அனுமதி வேண்டி தனி நபரோ அல்லது பொதுத்துறை நிறுவனங்களோ வேளாண்மை உழவா் நலத்துறையின் உழவா் செயலியில் விண்ணப்பிக்க வேண்டும். அந்தச் செயலியில் விண்ணப்பித்த பிறகு மேலும் விவரங்களுக்கு, சம்பந்தப்பட்ட வட்டார தோட்டக்கலை அலுவலகத்தை அணுகவும்.

பனை மரங்கள் வெட்டப்படுவது தொடா்பாக மாவட்ட அளவிலான குழுவின் முடிவே இறுதியானது. இவ்வாறு பனைமரம் வெட்டுவதற்கு முன்பு உரிய வழிமுறைகளைப் பின்பற்ற வேண்டும்.