39 மாற்றுத் திறனாளிகளுக்கு ரூ.6.34 லட்சத்தில் நலத்திட்ட உதவி: அமைச்சா் ஆா்.காந்தி வழங்கினாா்

காஞ்சிபுரம் மாவட்ட ஆட்சியா் அலுவலகத்தில் மாற்றுத்திறனாளிகள் நலத்துறை சாா்பில் நடைபெற்ற அனைத்து நாடுகள் மாற்றுத்திறனாளிகள் தின விழாவில் 39 பயனாளிகளுக்கு ரூ. 6.34 லட்சம் மதிப்பிலான அரசு நலத் திட்ட உதவிகளை கைத்தறி, துணி நூல் துறை அமைச்சா் ஆா்.காந்தி வழங்கினாா்.

காஞ்சிபுரம் மாவட்ட ஆட்சியா் அலுவலக மக்கள் நல்லுறவுக் கூட்ட அரங்கில் ஆட்சியா் கலைச்செல்வி மோகன் தலைமையில் அனைத்துலக மாற்றுத்திறனாளிகள் தின விழா புதன்கிழமை நடைபெற்றது. எம்எல்ஏ-க்கள் க.சுந்தா், எழிலரசன், மேயா் எம்.மகாலட்சுமி யுவராஜ், மாவட்ட மாற்றுத் திறனாளிகள் நல அலுவலா் மலா்விழி ஆகியோா் முன்னிலை வகித்தனா். கூட்டத்தில், அமைச்சா் ஆா்.காந்தி கலந்து கொண்டு, 39 மாற்றுத் திறனாளிகளுக்கு அரசு நலத் திட்ட உதவிகளை வழங்கிப் பேசியது:

ஆண்டுதோறும் டிசம்பா் 3-ஆம் தேதிய அனைத்துலக மாற்றுத் திறனாளிகள் தினமாக கொண்டாடப்பட்டு வருகிறது. சமூகம், பொருளாதாரம், அரசியல் மற்றும் கலாசார வாழ்க்கை ஆகியவை குறித்து மாற்றுத்திறனாளிகளுக்கு வளா்ச்சி பற்றிய விழிப்புணா்வை அதிகரிக்கவே இந்த விழா டிச. 3-ஆம் தேதி கொண்டாடப்பட்டு வருகிறது. மாற்றுத்திறனாளிகள் கலை நிகழ்ச்சிகள், விளையாட்டுப் போட்டிகள் ஆகியவை நடத்தப்பட்டு அவா்களின் தனித் திறமைகளை வெளிக்கொணரவும் விழா நடத்தப்படுகிறது என்றாா்.

விழாவில், 3 பேருக்கு ரூ. 3.15 லட்சம் மதிப்பில் இணைப்புச் சக்கரம் பொருத்தப்பட்ட பெட்ரோல் ஸ்கூட்டா்கள், 10 பேருக்கு ரூ.1.30 லட்சம் மதிப்பில் திறன் பேசிகள், 3 பேருக்கு ரூ. 36,000 மதிப்பில் 3 சக்கர வண்டிகள், 5 பேருக்கு ரூ. 47,000 மதிப்பில் மடக்கு சக்கர நாற்காலிகள், 10 பேருக்கு ரூ. 30,000 மதிப்பிலான காதொலி கருவிகள் உள்பட மொத்தம் 39 மாற்றுத்திறனாளிகளுக்கு ரூ. 6.34 லட்சம் மதிப்பிலான அரசு நலத்திட்ட உதவிகளை அமைச்சா் ஆா்.காந்தி வழங்கினாா்.