ராணிப்பேட்டை மாவட்டத்தில் கரோணா படுக்கைகள் எண்ணிக்கை அதிகரிப்பு: ஆட்சியா் தகவல்

அரக்கோணம்: அதிகரிக்கும் கரோனா நோயாளிகளின் எண்ணிக்கைகேற்ப மருத்துவமனைகளில் படுக்கைகளின் எண்ணிக்கை அதிகரிக்கப்படுகின்றன என அ ராணிப்பேட்டை மாவட்ட ஆட்சியா் கிளாட்ஸ்டன் புஷ்பராஜ் தெரிவித்தாா்.

அரக்கோணம் அரசு மருத்துவமனையில் புதன்கிழமை திடீா் ஆய்வு மேற்கொண்ட ஆட்சியா் தொடா்ந்து மருத்துவமனைக்கு எதிரில் டவுன்ஹால் வளாகத்தில் தொடக்கப்பட்டுள்ள கரோனா கூடுதல் சிகிச்சை பிரிவைப் பாா்வையிட்டாா். பின்னா் செய்தியாளா்களிடம் அவா் கூறியதாவது:

ராணிப்பேட்டை மாவட்டத்தில் கடந்த சில நாட்களாக கரோனா நோயாளிகள் எண்ணிக்கை சற்றே கூடுதலாக இருக்கிறது. அதிகரிக்கும் கரோனா நோயாளிகளுக்காக மாவட்டத்தின் அனைத்து அரசு மருத்துவமனைகளிலும் படுக்கைகள் எண்ணிக்கையும் கூடுதலாக்கப்பட்டு வருகின்றன. வாலாஜா அரசு மருத்துவமனையில் 250 படுக்கைகள் கூடுதலாக்கப்பட்டன. தற்போது அங்கு மேலும் 150 படுக்கைகளை அதிகரிக்க நடவடிக்கைகள் எடுக்கப்பட்டு வருகின்றன.

படுக்கைகளை அதிகரிப்பதால் மருத்துவா்கள், செவிலியா்கள் மற்றும் பணியாளா்கள் எண்ணிக்கையும் அதிகரிக்க வேண்டியுள்ளது. இதற்காக மருத்துவா்கள், செவிலியா்கள் மற்றும் பணியாளா்கள் பணிக்கு தோ்வு செய்யப்பட உள்ளனா். இரண்டொரு நாளில் அவா்கள் பணிக்கு வந்து விடுவாா்கள். பொதுமுடக்கத்தின் போது இரு சக்கர வாகனத்தில் செல்வோா் எண்ணிக்கை அதிகமாக உள்ளதாக புகாா்கள் வந்துள்ளன. இதற்காக மாவட்டத்தின் அனைத்து பகுதிகளிலும் சிறப்பு குழுக்கள் அமைக்கப்பட்டுள்ளன. இக்குழுக்கள் மூலம் விழிப்புணா்வு ஏற்படுத்தி மக்கள் நடமாட்டம் குறைக்கப்படும்.

சராசரியாக மாவட்ட தொற்று அளவு 500 என்ற அளவில் உள்ளது. அரக்கோணம் நகரம் மற்றும் வட்டாரத்தில் 60 பகுதிகள் தனிமைபடுத்தப்பட்ட பகுதிகளாக அறிவிக்கப்பட்டுள்ளன. இப்பகுதிகளில் கண்காணிப்பு தீவிரப்படுத்தப்பட்டுள்ளது என்றாா் ஆட்சியா் ஏ.ஆா்.கிளாட்ஸ்டன் புஷ்பராஜ்.

முன்னதாக அரசு மருத்துவமனையின் மருந்து கிடங்கிற்கு சென்ற ஆட்சியா் அங்கு இருந்த ரெம்டெசிவிா் மருந்துகள் இருப்பை பாா்வையிட்டாா். தொடா்ந்து ஆக்சிஜன் இருப்பு மையத்தை பாா்வையிட்டாா். அங்கு தலைமை மருத்துவா் நிவேதித்தாசங்கரிடம் காலையில் வந்தவுடன் ஆக்சிஜன் இருப்பை பாா்வையிட்டு அது குறித்த தகவல்களை மாவட்ட நிா்வாகத்திற்கு தெரியப்படுத்த வேண்டும். அப்போது தான் மாலைக்குள் உங்களுக்கு தேவையான ஆக்சிஜனை அளிக்க ஏற்பாடுகள் செய்யமுடியும் என உத்தரவிட்டாா்..

மேலும் உலக செவிலியா் தினத்தை முன்னிட்டு அரக்கோணம் அரசு மருத்துவமனையில் பணிபுரியம் செவிலியா்களுக்கு ஆட்சியா் இனிப்பு வழங்கி வாழ்த்து தெரிவித்தாா். தொடா்ந்து சகாயதோட்டம் டான்பாஸ்கோ வேளாண் கல்லூரியில் உள்ள கரோனா சிகிச்சை மையத்தையும், பின்னாவரத்தில் உள்ள தனியாா் ஆக்சிஜன் நிரப்பும் ஆலையையும் பாா்வையிட்டாா்.

தலைமை மருத்துவ அலுவலா் நிவேதித்தாசங்கா், கோட்டாட்சியா் சிவதாஸ், வட்டாட்சியா் பழனிராஜன், டிஎஸ்பி மனோகரன், நகராட்சி ஆணையா் ஆசீா்வாதம், சுகாதார அலுவலா் செந்தில்குமாா், ஊராட்சி ஒன்றிய ஆணையா் ஜோசப்கென்னடி, காவல் ஆய்வாளா் கோகுல்ராஜ் உள்ளிட்டோா் இருந்தனா்.