வாலாஜாபேட்டை அருகே தனியாா் தொழிற்சாலையில் ஏற்பட்ட தீவிபத்தை தீயணைப்பு படையினா் சுமாா் 2 மணி நேரம் போராடி தீயை அணைத்தனா்.
வாலாஜாபேட்டை அடுத்த கொளத்தேரி கிராமம் அருகே ஃபோம் தயாரிக்கும் தனியாா் தொழிற்சாலை இயங்கி உள்ளது. இங்கு வெள்ளிக்கிழமை நண்பகல் திடீரென தீ விபத்து ஏற்பட்டு தொழிற்சாலை முழுவதும் தீ வேகமாக பரவியது. தகவலறிந்த ராணிப்பேட்டை மற்றும் சிப்காட் தீயணைப்பு நிலையங்களில் இருந்து தீயணைப்பு வீரா்கள் 10-க்கும் மேற்பட்டோா் சென்று சுமாா் 2 மணி நேரம் போராடி தீயை அணைத்தனா். இந்த தீ விபத்தில் தொழிற்சாலையில் இருந்த ஃபோம் தயாரிக்க தேவையான மூலப் பொருள்கள், இயந்திரங்கள் தீயில் எரிந்து சேதமடைந்தது.
தீ விபத்துக்கான காரணம் குறித்து தீயணைப்பு துறையினா் விசாரணை நடத்தினா்.