அரக்கோணம் ரயில் நிலையம் நவீனப்படுத்தும் பணிகள் 8 மாதத்தில் நிறைவு: தெற்கு ரயில்வே பொதுமேலாளா்

அரக்கோணம் ரயில்நிலையத்தை அம்ரீத் பாரத் திட்டத்தின் கீழ் நவீனப்படுத்தும் பணிகள் எட்டு மாதத்தில் நிறைவடையும் என தெற்கு ரயில்வே பொதுமேலாளா் ஆா்.என்.சிங் தெரிவித்தாா்
அரக்கோணம் ரயில் நிலையம் நவீனப்படுத்தும் பணிகள் 8 மாதத்தில் நிறைவு: தெற்கு ரயில்வே பொதுமேலாளா்

அரக்கோணம் ரயில்நிலையத்தை அம்ரீத் பாரத் திட்டத்தின் கீழ் நவீனப்படுத்தும் பணிகள் எட்டு மாதத்தில் நிறைவடையும் என தெற்கு ரயில்வே பொதுமேலாளா் ஆா்.என்.சிங் தெரிவித்தாா்.

இந்திய ரயில்வேயின் புதிய திட்டமான அம்ரீத் பாரத் திட்டத்தில் அரக்கோணம் ரயில்நிலையத்தை சீரமைக்கும் பணிகள் அண்மையில் தொடங்கப்பட்டு முழுவீச்சில் நடைபெற்று வருகின்றன.

இத்திட்டப்பணிகளை வியாழக்கிழமை ஆய்வு செய்தபின் தெற்கு ரயில்வே பொது மேலாளா் ஆா்.என்.சிங் செய்தியாளா்களிடம் கூறியது:

அம்ரீத் பாரத் திட்டத்தில் அரக்கோணம் ரயில்நிலையத்தில் முகப்பு பழைய கட்டடம் சீரமைக்கும் பணிகள், புதிய கட்டட கட்டுமானத்திற்கான ஆரம்பக்கட்ட பணிகள் நடைபெற்று வருகின்றன.

மேலும், இந்த ரயில் நிலையத்தில் 12 மீட்டா் அகலத்தில் கட்டப்பட இருக்கும் நடைமேடைகளுக்கிடையான மேம்பால ஆரம்பகட்ட பணிகளும் தொடங்கப்பட்டுள்ளன. நிலையத்தின் உள்ளே நடைமேடைகள் நீட்டிப்பு, பணிமனைகள் விஸ்தரிப்பு போன்றவை ஏற்கனவே திட்டமிட்டப்படி நடைபெறுகின்றன. இந்த பணிகள் அடுத்த எட்டு மாதத்தில் முடிவடையும் என்றாா் ஆா்.என்.சிங்.

முன்னதாக கும்மிடிபூண்டி, திருத்தணி ஆகிய ரயில்நிலையங்களில் அம்ரீத் பாரத் திட்ட கட்டுமான பணிகளை ஆய்வு செய்தபின் சிறப்பு ரயிலில் அரக்கோணம் வந்த பொதுமேலாளா் ஆா்.என்.சிங் தற்போதுள்ள நடைமேடை மேம்பாலங்களை பாா்வையிட்டாா்.

தொடா்ந்து ரயில்நிலைய முகப்பு பகுதிக்கு வந்த அவா், முகப்பு பழைய கட்டட சீரமைப்பு பணிகளையும், புதிய கட்டடத்துக்கான ஆரம்பக்கட்ட பணிகளையும் பாா்வையிட்டாா்.

பணிகளை குறிப்பிட்ட காலத்திற்குள் முடிக்க வேண்டும் என அறிவுறுத்தினாா். மேலும், நிலைய முகப்பு பகுதியில் ஏற்கனவே அம்ரீத் பாரத் திட்டத்தில் குறிக்கப்பட்ட பணிகளுக்கான வரைப்படங்களை பாா்த்து அதில் சில மாற்றங்களையும் அமல்படுத்த பொறியியல் பிரிவு அதிகாரிகளுக்கு அறிவுறுத்தினாா்.

சென்னை கோட்ட மேலாளா் விஸ்வநாத் ஹொ்யா, அரக்கோணம் ரயில்நிலைய மேலாளா் ராதாகிருஷ்ணன், போக்குவரத்து ஆய்வாளா் வெங்கடேசன் உள்ளிட்ட அதிகாரிகளும் உடனிருந்தனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

Related Stories

No stories found.
Dinamani
www.dinamani.com