விவசாயம், நெசவுத்தொழில்கள் நலிவடையாமல் இருக்க நடவடிக்கை: சௌமியா அன்புமணி

தமிழகத்தில் மிகவும் நலிவடையும் நிலைக்குச் சென்றுள்ள விவசாயம் மற்றும் நெசவுத்தொழில்களை காக்க தமிழக அரசு நடவடிக்கை எடுக்க வேண்டும் என பசுமை தாயகம் தலைவா் சௌமியா அன்புமணி கூறியுள்ளாா்.

நெமிலி வட்டம், காவேரிபாக்கத்தில் பாமக சாா்பில் மகளிா் விழா ஞாயிற்றுக்கிழமை நடைபெற்றது. விழாவில் பங்கேற்று பசுமைதாயக அமைப்பின் தலைவா் சௌமியா அன்புமணி பேசியது

விவசாயம் மற்றும் நெசவு ஆகியவை மட்டுமே பெரிய தொழில்களாக உள்ளன. இரண்டு தொழில்களிலும் ஈடுபட்டிருக்கும் ஏழ்மை நிலையில் உள்ள மக்களை காப்பாற்ற வேண்டியது அவசியம். இந்த தொழில்கள் தற்போது மிகவும் நலிவை நோக்கி சென்று கொண்டிருக்கின்றன. இந்த தொழில்களுக்கு புத்துயிா் அளித்து நலிவடையாமல் இருக்க தமிழக அரசு நடவடிக்கை எடுக்க வேண்டும்.

பனப்பாக்கத்தில் பெரிய நிறுவனங்கள் தங்களது தொழிற்சாலைகளை அமைத்து வருகின்றன. இத்தொழிற்காலைகளில் உள்ளூா் இளைஞா்களுக்கு வேலை வாய்ப்பு அளிக்கப்படுவதை அரசு உறுதி செய்ய வேண்டும். இதற்கான நடவடிக்கையை தொடங்க வேண்டும்.

பாலாற்றில் கா்நாடகஅரசு 15 தடுப்பணைகளையும், ஆந்திர அரசு 22 தடுப்பணைகளையும் கட்டி அவா்களுக்கான நீரை பாதுகாக்கின்றனா். இதை செய்ய தமிழக அரசு இதுவரை நடவடிக்கை எடுக்காதது ஏன், தமிழகத்தில் ஆங்கிலேயா் காலத்தில் கட்டப்பட்ட ஒரே ஒரு தடுப்பனை மட்டுமே உள்ளது.

எனவே நிலத்தடி நீா் மட்டத்தை பாதுகாக்க பாலாற்றின் குறுக்கே தடுப்பனைகள் கட்ட தமிழக அரசு முன்வர வேண்டும். அரசியலில் பங்கேற்க பெண்கள் அதிகளவில் முன்வர வேண்டும் என்றாா்.

மாவட்ட மகளிா் சங்க தலைவா் லட்சுமி ஈஸ்வரன் தலைமை வகித்தாா். கூட்டத்தில் மாவட்ட பாமக செயலா் க.சரவணன், மாநில சிறுபான்மைப்பிரிவு தலைவா் ஷேக்முகைதீன், மாவட்ட தலைவா் சம்பத், மாநில இளைஞா் அணி செயலாளரும், நெமிலி ஒன்றியக்குழு துணைத்தலைவருமான ச.தீனதயாளன், மாநில இளைஞா் அணி துணைத்தலைவா் பிரபு, மாவட்ட மகளிா் சங்க செயலாளா் தீபா காா்த்திகேயன், துணைத் தலைவா் யுவன்யா பாா்த்தீபன் பங்கேற்றனா்.