சிஎஸ்ஐ பள்ளிகளுக்கு தலா ரூ. 1 லட்சத்தில் டிஜிட்டல் பேனல்: சென்னை பேராயா் அறிவிப்பு!

சென்னை பேராயத்தின் கீழ் உள்ள அனைத்து சிஎஸ்ஐ பள்ளிகளுக்கும் ரூ.1 லட்சத்தில் ஸ்மாா்ட் கிளாஸ் டிஜிட்டல் பேனல் வழங்கப்படும் என சென்னை பேராயத்தின் பேராயா் பால் பிரான்சிஸ் ரவிச்சந்திரன் தெரிவித்தாா்.

அரக்கோணம் பழைய பேருந்து நிலையத்தின் அருகில் உள்ள சிஎஸ்ஐ சென்ட்ரல் மேல்நிலைப்பள்ளியில் இடைநிலை ஆய்வக திறப்பு விழா, ஸ்மாா்ட் வகுப்பறை திறப்பு விழா, பிராா்த்தனை கூட திறப்பு விழா, மூலிகை தோட்ட திறப்பு விழா, தலைமையாசிரியா் அறை புதுப்பித்து திறப்பு விழா ஆகிய ஐம்பெரும் விழாவில் பங்கேற்று திறந்து வைத்து சென்னை பேராயா் பால் பிரான்சிஸ் ரவிச்சந்திரன் பேசியது:

பள்ளிகளுக்கு பெற்றோா் ஆசிரியா்களை நம்பியே அனுப்புகின்றனா். அந்த பிள்ளைகளுக்கு சிறப்பான கல்வியை கற்றுக்கொடுக்க வேண்டியது ஆசிரியா்களின் கடமை. அதையும் விட ஒழுக்கத்தை நல்ல பண்புகளை அந்த பிள்ளைகளுக்கு சிறுவயதில் இருந்தே ஆசிரியா்கள் கற்றுக் கொடுக்க வேண்டும்.

நாம் கல்வி, மருத்துவம், ஆன்மிகம் போன்ற பணிகளை மேற்கொள்ள நமது முன்னோா் நமக்கு வழிகாட்டியுள்ளனா். இதன் வழியில் கண்ணியமான கல்வியை சிறப்பாக செயல்படுத்த அனைத்து முயற்சிகளையும் பேராயா் என்ற முறையில் நான் மேற்கொள்வேன். இதற்கு தேவையான அனைத்து உதவிகளையும் பேராய பள்ளிகளுக்கு செய்வேன் என்றாா் பேராயா் பால் பிரான்சிஸ் ரவிச்சந்திரன்.

விழாவில் பள்ளியின் தலைமை ஆசிரியா் ராபா்ட் வரவேற்றாா். தாளாளா் மேரிகற்பகம் பேராயருக்கு நினைவு பரிசு வழங்கினாா். இதில் மத்திய வட்டார தலைவா் ஆயா் ஜான் சாலமோன் உள்ளிட்ட பல ஆயா்கள் மற்றும் சென்னை பேராய நிா்வாகிகள், பேராயத்துக்குட்பட்ட திருச்சபைகளின் நிா்வாகிகள், அரக்கோணம், சோளிங்கா், திருவள்ளூா், திருத்தணி பகுதிகளில் உள்ள சிஎஸ்ஐ பள்ளிகளின் தலைமை ஆசிரியா்கள், ஆசிரிய, ஆசிரியைகள் பங்கேற்றனா். உதவி தலைமை ஆசிரியா் வில்சன் நன்றி தெரிவித்தாா்.