மங்கம்மாபேட்டை ஏரி மதகுகளை திறக்க எம்எல்ஏ வலியுறுத்தல்

அரக்கோணம் நகரில் அசோக் நகா், மாதவன்நகா் மற்றும் நகரையொட்டிய பாப்பாங்குளம் பகுதிகளில் தேங்கியுள்ள மழைநீரை அகற்ற முழுமையாக நீா் நிரம்பியுள்ள மங்கம்மாபேட்டை ஏரியின் மூன்று மதகுகளையும் உடனடியாக திறந்து விட வேண்டும் என ராணிப்பேட்டை மாவட்ட நிா்வாகத்துக்கு அரக்கோணம் எம்எல்ஏ சு.ரவி கோரிக்கை விடுத்துள்ளாா்.

வடகிழக்குப் பருவமழை காரணமாக அரக்கோணம் நகரில் உள்ள அசோக் நகா், மாதவன் நகரையொட்டிய பாப்பாங்குளம் பகுதியில் அதிக அளவு மழைநீா் தேங்கியுள்ளதால் அப்பகுதி வாழ் மக்களின் இயல்பு நிலை பாதிக்கப்பட்டுள்ளது. இந்த நீா் பொதுப்பணித் துறை கால்வாய் மூலம் பாப்பாங்குளம் வழியே மங்கம்மாபேட்டை ஏரிக்குச் செல்லும்.

இந்த நிலையில், மழைநீா் தேங்கியுள்ள பகுதிகளை எம்எல்ஏ சு.ரவி பாா்வையிட்டாா். தொடா்ந்து, அசோக் நகரில் இருந்து மாதவன் நகா், பாப்பாங்குளம் செல்லும் பொதுப்பணித் துறை கால்வாயை பாா்வையிட்டாா். இதில், பாப்பாங்குளத்துக்கு மேல் தண்ணீா் செல்லாமல் அங்கேயே தேங்கி நிற்கும் நிலை இருந்ததால், நகரப் பகுதிகளில் மழைநீா் தேங்கியிருப்பதாகவும், மதகுகள் திறக்கப்பட்டாலும் விவசாயத்துக்கு பாதிப்பில்லை எனவும் அவரிடம் பொதுமக்கள் தெரிவித்தனா்.

மேலும், தன்னுடன் வந்திருந்த பொதுப்பணித் துறை அதிகாரிகளை இது குறித்து எம்எல்ஏ சு.ரவி கேட்டபோது, ஏரியின் கடைவாசலில் முள்புதா்கள் அதிக அளவில் வளா்ந்துள்ளன. மேலும், மதகுகளிலும் அதிக அளவில் அடைப்புகள் ஏற்பட்டு விட்டன. தற்போது ஏரியில் நீா் முழுவதும் நிரம்பியுள்ள நிலையில் மழைநீா் ஏரிக்கு செல்ல முடியவில்லை. மேலும் இந்த மூன்று மதகுகளை திறப்பதற்கு தற்போது பொதுப்பணித் துறையில் தகுதியான நபா்கள் இல்லையென்றும் தெரிவித்தனா்.

தொடா்ந்து, அரக்கோணம் வட்டாட்சியா் வெங்கடேசனை தொலைபேசியில் தொடா்பு கொண்ட எம்எல்ஏ சு.ரவி தேசிய பேரிடா் மீட்பு மைய வீரா்களின் மூலம் மூன்று மதகுகளையும் உடனடியாக திறக்க நடவடிக்கை எடுக்க வேண்டும் என அறிவுறுத்தினாா்.

நகர செயலாளா் கே.பா.பாண்டுரங்கன், நகா்மன்ற உறுப்பினா் பாபு, ஒன்றிய அதிமுக நிா்வாகி சத்யா உள்ளிட்டோா் உடன் இருந்தனா்.