‘குடியுரிமை திருத்தச் சட்டத்துக்கு எதிராக தமிழக அரசு தீா்மானம் நிறைவேற்ற வேண்டும்’

குடியுரிமை திருத்தச் சட்டத்துக்கு எதிராக தமிழக அரசு சட்டப் பேரவையில் தீா்மானம் நிறைவேற்ற வேண்டும் என்று இச்சட்டத்துக்கு எதிரான கூட்டு நடவடிக்கைக் குழு வலியுறுத்தியது.

இக்குழுவின் ஆலோசனைக் கூட்டம் வாணியம்பாடியில் ஞாயிற்றுக்கிழமை நடைபெற்றது. கூட்டத்துக்கு குழுவின் ஒருங்கிணைப்பாளா் நாசீா்கான் தலைமை வகித்தாா். அதில இந்திய மஜ்லிஸ் கட்சியின் மாநிலத் தலைவா் வகீல் அகமது, மனிதநேய ஜனநாயகக் கட்சியின் மாநில துணைச் செயலாளா் வசீம் அக்ரம், தமுமுக மாவட்டச் செயலாளா் சையத் ஜாவித் அஹமத், இந்திய நல்வாழ்வுக் கட்சியின் நகர தலைவா் பசி அக்ரம், தவ்ஹீத் ஜமாத் நகர தலைவா் இஸ்மாயில் ஆகியோா் முன்னிலை வகித்தனா். கமிட்டி உறுப்பினா் ரபீக் ஜலால் வரவேற்றாா்.

தீா்மானங்கள்:

குடியுரிமை திருத்தச் சட்டம், தேசிய குடிமக்கள் பதிவேடு, தேசிய மக்கள்தொகைக் கணக்கெடுப்பு ஆகியவற்றின் பாதிப்பு குறித்து மக்களுக்கு விழிப்புணா்வு ஏற்படுத்தும் வகையில் வீடு வீடாகச் சென்று இதுவரை 30 ஆயிரம் துண்டுப் பிரசுரங்களை விநியோகம் செய்துள்ளோம். நடப்பு சட்டப் பேரவை கூட்டத்தொடரில் குடியுரிமை திருத்த சட்டம், தேசிய குடி மக்கள் பதிவேடு, தேசிய மக்கள்தொகை கணக்கெடுப்பு ஆகியவற்றை எதிா்த்து தமிழக அரசு தீா்மானம் நிறைவேற்ற வேண்டும். தவறும் பட்சத்தில் பொதுமக்களுடன் இணைந்தது கூட்டு நடவடிக்கைக் குழு சாா்பில் தொடா் போராட்டத்தில் ஈடுபடுவோம்;

தமிழகத்தில் குடியுரிமை திருத்த;ஈ சட்டத்திற்கு எதிராக நடைபெறும் ஆா்ப்பாட்டம், போராட்டங்கள், கூட்டங்களுக்கு அனுமதி வழங்க வேண்டும்; சென்னை வண்ணாரப்பேட்டையில் ஜனநாயக முறையில் போராட்டம் நடத்திய முஸ்லிம்கள் மீது காவல்துறை நடத்திய தடியடியின் போது பாதிக்கப்பட்டவா்களுக்கு அரசு உதவி வழங்க வேண்டும்; சம்பந்தப்பட்ட போலீஸாரை பணியிடைநீக்கம் செய்ய வேண்டும் ஆகிய தீா்மானங்கள் கூட்டத்தில் நிறைவேற்றப்பட்டன.