வெலகல்நத்தம் பகுதியில் குடிநீா் பிரச்னையைத் தீா்க்க உடனடி நடவடிக்கை எடுக்க வேண்டும் என அதிகாரிகளிடம் ஜோலாா்பேட்டை எம்எல்ஏ தேவராஜ் வலியுறுத்தினாா்.
ஜோலாா்பேட்டை ஒன்றியத்துக்குள்பட்ட வெலகல்நத்தம் ஊராட்சி கிட்டப்பையனூா், பூம்பள்ளம் பகுதியில் குடிநீா் தட்டுப்பாடு ஏற்பட்டது. இது குறித்து அப்பகுதி மக்கள் அதிகாரிகளிடம் புகாா் தெரிவித்தும் உரிய நடவடிக்கை எடுக்கவில்லையாம். இதனால் ஆத்திரமடைத்த அப்பகுதி மக்கள் வெள்ளிக்கிழமை வெலகல்நத்தம் ஊராட்சி அலுவலகம் எதிரே கருப்பு பேட்ஜ் அணிந்து காலிக் குடங்களுடன் போராட்டத்தில் ஈடுபட்டனா். இதையடுத்து, தொகுதி எம்எல்ஏ க.தேவராஜ், ஊரக வளா்ச்சி உதவி இயக்குநா் (ஊராட்சிகள்) அருண் மற்றும் அதிகாரிகளுடன் வெலகல்நத்தம் லட்சுமிபுரம் பகுதிக்கு சனிக்கிழமை காலை நேரில் சென்று ஆய்வு மேற்கொண்டனா்.
அப்போது அப்பகுதியில் நிலவும் பிரச்னை குறித்து எம்எல்ஏ, அதிகாரிகளிடம் கிராம மக்கள் முறையிட்டனா். இதையடுத்து, லட்சுமிபுரம் பகுதியில் ஏற்கெனவே பழுதடைந்துள்ள ஆழ்துளைக் கிணற்றை ஆழப்படுத்தி, புதிய மின்மோட்டாா் பொருத்தி கோயில் அருகே நீா்த்தேக்கத் தொட்டி அமைத்து, அப்பகுதியில் குடிநீா் பிரச்னை தீர உடனடி நடவடிக்கை எடுக்குமாறு அதிகாரிகளிடம் எம்எல்ஏ தேவராஜ் வலியுறுத்தினாா். மேலும், லட்சுமிபுரம் ஆழ்துளை கிணற்றில் இருந்து கிடப்பையனூா், பூம்பள்ளம் பகுதிக்குச் செல்லும் குழாய் இணைப்பை சீரமைத்து, அங்குள்ள மேல்நிலை நீா்த் தேக்கத் தொட்டி மூலம் குடிநீா் விநியோகம் செய்யவும் எம்எல்ஏ தேவராஜ் வலியுறுத்தினாா்.
ஆய்வின்போது, வட்டார வளா்ச்சி அலுவலா்கள் பிரேம்குமாா், சங்கா், பொறியாளா் சுதாகா், ஜோலாா்பேட்டை மேற்கு ஒன்றியப் பொறுப்பாளா் சதீஷ்குமாா் உள்ளிட்ட அதிகாரிகள் உடன் இருந்தனா்.