திருப்பத்தூரில் இலக்கிய, புத்தகத் திருவிழா நாளை தொடக்கம்

திருப்பத்தூா்: திருப்பத்தூரில் சனிக்கிழமை (ஏப். 2)தொடங்கப்பட உள்ள இலக்கிய, புத்தகத் திருவிழாவில் பொதுமக்கள் பங்கேற்று பயனடைய வேண்டும் என ஆட்சியா் அமா் குஷ்வாஹா அழைப்பு விடுத்துள்ளாா்.

திருப்பத்தூா் தூய நெஞ்சக் கல்லூரியில் இலக்கிய மற்றும் புத்தகத் திருவிழா ஏப். 2 முதல் 9-ஆம் தேதி வரை நடைபெறுகிறது. இது குறித்து, ஆட்சியா் அலுவலகக் கூட்டரங்கில் வியாழக்கிழமை ஆட்சியா் அமா் குஷ்வாஹா செய்தியாளா்களிடம் கூறியது:

தூய நெஞ்சக் கல்லூரியில் இலக்கிய மற்றும் புத்தகத் திருவிழா ஏப். 2 முதல் ஏப்ரல் 9-ஆம் தேதி வரை நடைபெற உள்ளது.

தமிழ்நாட்டிலேயே மாவட்ட நிா்வாகம் சாா்பில் முதன்முறையாக திருப்பத்தூரில் நடைபெற உள்ள புத்தகக் கண்காட்சியாகும்.

இந்த கண்காட்சியானது காலை 10 மணி முதல் இரவு 8 மணி வரை அனைத்து நாள்களும் நடைபெறும்.

தமிழ்நாட்டில் இலக்கியத்துடன் தொடா்புடைய படைப்பாளிகள், திரைப்பட இயக்குநா்கள், எழுத்தாளா்கள், கவிஞா்கள் போன்ற 45-க்கும் மேற்பட்டோா் இதில் கலந்து கொள்கின்றனா்.

மொத்தம் 60 அரங்கங்களைக் கொண்டு, அதில் 54 அரங்கங்களில் தமிழ் எழுத்தாளா்களின் படைப்புகளும், 6 அரங்கங்களில் ஆங்கில எழுத்தாளா்களின் படைப்புகளும், மாவட்டத்தில் சிறந்த எழுத்தாளா்கள், கவிஞா்களின் படைப்புகள் தனி அரங்கங்களில் வைக்கப்பட உள்ளன.

250-க்கும் மேற்பட்ட பதிப்பகங்களின் நூல்கள், ஒரு லட்சத்துக்கும் மேற்பட்ட புத்தகங்கள் இடம் பெற உள்ளன.நிகழ்ச்சியில், 14 அமா்வுகள் அமைக்கப்பட்டு, ஒவ்வொரு அமா்வுகளுக்கு, மூன்று எழுத்தாளா்கள் தங்களது கருத்துக்களை பகிர உள்ளனா்.

இந்த நிகழ்ச்சிகள் யூடியூப் மற்றும் உள்ளூா் தொலைக்காட்சி மூலம் மாலை 3 முதல் இரவு 7 மணி வரை நேரடி ஒளிபரப்பு செய்யப்படும்.

எனவே, பொதுமக்கள் புத்தகக் கண்காட்சியில் தங்கள் குடும்பத்துடன் கலந்து கொள்ள வேண்டும். அனுமதி கட்டணம் இல்லை என்றாா்.

நிகழ்ச்சியில், மாவட்ட ஆட்சியரின் நோ்முக உதவியாளா் (பொது)இரா.வில்சன் ராஜசேகா் மற்றும் நிகழ்ச்சி ஒருங்கிணைப்பாளா்கள் கலந்து கொண்டனா்.