திருப்பத்தூா் மாவட்டத்தில் 90 % மனுக்கள் மீது தீா்வுகாண முடிவு செய்யப்பட்டுள்ளதாக சட்டப்பேரவை மனுக்கள் குழுத் தலைவா் கோவி.செழியன் தெரிவித்தாா்.
திருப்பத்தூா் ஆட்சியா் அலுவலக கூட்டரங்கில் தமிழக சட்டப் பேரவை மனுக்கள் குழு ஆய்வுக் கூட்டம் வியாழக்கிழமை நடைபெற்றது. குழுவின் தலைவரும், அரசு தலைமைக் கொறடாவுமான கோவி.செழியன் தலைமை வகித்தாா். சட்டப்பேரவை செயலாளா் கி.சீனிவாசன், ஆட்சியா் அமா் குஷ்வாஹா, மனுக்கள் குழு உறுப்பினா்கள் மு.பெ.கிரி, ஏ.எம்.வி.பிரபாகரராஜா, எம்எல்ஏ-க்கள் க.தேவராஜி (ஜோலாா்பேட்டை), அ.நல்லதம்பி (திருப்பத்தூா்), அ.செ.வில்வநாதன் ஆகியோா் முன்னிலை வகித்தனா்.
பின்னா், கோவி.செழியன் செய்தியாளா்களிடம் கூறியது:
திருப்பத்தூா் மாவட்டத்தில் மேம்பாலம், சாலை வசதி, கால்வாய் வசதி குறித்த மனுக்களின் பேரில், 3 இடங்களில் கள ஆய்வு செய்யப்பட்டது. மொத்தம் 73 மனுக்கள் வரப்பெற்றது. அதில், 32 மனுக்கள் மீது தீா்வு காணப்பட்டுள்ளது. மீதமுள்ள 41 மனுக்கள் குறித்து ஆலோசிக்கப்பட்டுள்ளது. 90 சதவீத மனுக்கள் மீது தீா்வுகாண இக்கூட்டத்தில் முடிவு செய்யப்பட்டுள்ளது.
நீண்ட நாள்களாக நிலுவையில் இருந்த 3 மனுக்கள் இன்று விசாரணைக்கு எடுத்துக் கொள்ளப்பட்டது என்றாா்.
கூட்டத்தில், எஸ்.பி. கி.பாலகிருஷ்ணன், மாவட்ட வருவாய் அலுவலா் இ.வளா்மதி, மனுக்கள் குழு இணைச் செயலாளா் மு.கருணாநிதி, சாா்பு செயலாளா் மோகன்ராஜா, ஆட்சியரின் நோ்முக உதவியாளா் இரா.வில்சன் ராஜசேகா், மாவட்ட ஊரக வளா்ச்சி முகமைத் திட்ட இயக்குநா் கு.செல்வராசு, மாவட்ட ஊராட்சிக் குழுத் தலைவா் என்.கே.ஆா்.சூரியகுமாா், மாவட்ட பால்வளத் தலைவா் எஸ்.ராஜேந்திரன், நகா்மன்றத் தலைவா் க.சங்கீதா வெங்கடேஷ், மாவட்ட அறங்காவலா் குழுத் தலைவா் அன்பழகன், அலுவலா்கள் கலந்துகொண்டனா்.