ஜோலாா்பேட்டையில் மாவட்ட அளவிலானமுதல்வா் கோப்பை விளையாட்டுப் போட்டிகள்

ஜோலாா்பேட்டையில் மாவட்ட அளவிலான முதல்வா் கோப்பைக்கான விளையாட்டுப் போட்டியை மாவட்ட வருவாய் அலுவலா் இ.வளா்மதி திங்கள்கிழமை தொடக்கி வைத்தாா்.

2022-23-ஆம் ஆண்டுக்கான முதல்வா் கோப்பை விளையாட்டுப் போட்டிகள் திருப்பத்தூா் மாவட்டம் ஜோலாா்பேட்டையில் உள்ள சிறு விளையாட்டு அரங்கில் திங்கள்கிழமை நடைபெற்றது.

இதில் பள்ளி, கல்லூரி மாணவ, மாணவிகள், மாற்றுத்திறனாளிகள், மத்திய-மாநில அரசு ஊழியா்கள், உள்ளாட்சி அமைப்பு ஊழியா்களுக்கான போட்டிகள் நடத்தப்படுகின்றன.

மாவட்ட அளவிலான முதல்வா் கோப்பை விளையாட்டுப் போட்டியை மாவட்ட வருவாய் அலுவலா் வளா்மதி தலைமை வகித்து தொடக்கி வைத்தாா். மாவட்ட விளையாட்டு, இளைஞா் நல அலுவலா் சேதுராஜன் வரவேற்றாா். மாவட்ட முதன்மைக் கல்வி அலுவலா் மதன்குமாா், வருவாய்க் கோட்டாட்சியா் லட்சுமி, மாவட்ட கவுன்சிலா் கவிதா தண்டபாணி, ஜோலாா்பேட்டை ஒன்றியக் குழு தலைவா் எஸ். சத்யா சதீஷ்குமாா், நகா்மன்றத் தலைவா் மா.காவியா விக்டா், துணைத் தலைவா் இந்திரா பெரியாா்தாசன், ஒன்றியக்குழு உறுப்பினா் க.உமாகன்ரங்கம், நகராட்சி ஆணையா் பழனி ஆகியோா் முன்னிலை வகித்தனா்.

மாவட்ட வருவாய் அலுவலா் வளா்மதி பேசியது:

தமிழகத்தில் அதிக அளவில் விளையாட்டுப் போட்டிகளில் பங்கேற்க முன்பதிவு செய்துள்ள மாவட்டங்களில் திருப்பத்தூா் மாவட்டம் 2-ஆம் இடம் பெற்றுள்ளது. மேலும் மாவட்ட அளவிலான விளையாட்டுப் போட்டியில் பள்ளி, கல்லூரி மாணவா்கள், அரசு ஊழியா்கள், மாற்றுத்திறனாளிகள், பொதுமக்கள் என தனித் தனியாக போட்டிகள் நடத்தப்படுகின்றன.

அனைவரும் பங்கேற்று மாவட்ட அளவில் வெற்றி பெற்று மாநிலம், தேசிய அளவிலான போட்டிகள் மற்றும் ஒலிம்பிக் போட்டிகளில் பங்கேற்று தமிழகத்துக்கு பெருமை சோ்க்க வேண்டும் என்றாா்.

இந்தப் போட்டியில் துறை அலுவலா்கள், உடல் கல்வி ஆசிரியா்கள் மற்றும் மாவட்டம் முழுவதும் பல்வேறு பகுதிகளில் இருந்து வந்த பள்ளி மாணவிகள் உள்பட சுமாா் 500-க்கும் மேற்பட்டோா் பங்கேற்றனா்.