பெண் கொலை: மகள், மருமகன் கைது

புதூா்நாடு அருகே தாயை கொலை செய்த வழக்கில் மகள், மருமகனை போலீஸாா் கைது செய்தனா்.

திருப்பத்தூா் மாவட்டம், ஜவ்வாது மலைக்கு உள்பட்ட புதூா்நாடு அருகே நடுகுப்பம் கிராமத்தைச் சோ்ந்தவா் சாம்பசிவம். இவரின் மனைவி சின்னகாளி(40). கூலித் தொழிலாளி. இவா்களுக்கு காளீஸ்வரி, கீதா என்ற 2 மகள்கள் உள்ளனா். 2 மகள்களும் திருமணமாகி சென்றுவிட்டனா். இந்தநிலையில் சாம்பசிவமும் கடந்த சில மாதங்களுக்கு முன்பு இறந்துவிட்டாா்.

இதனால் சின்னகாளி மட்டும் வீட்டில் தனியாக வசித்து வந்தாா். இந்த நிலையில், கடந்த 11-ஆம் தேதி சின்னகாளி தனது வீட்டின் அருகே உள்ள விவசாய நிலத்தில் தலையில் பலத்த காயத்துடன் மா்மமான முறையில் இறந்து கிடந்தாா். இது குறித்து தகவல் அறிந்த திருப்பத்தூா் கிராமிய போலீஸாா் சம்பவம் குறித்து வழக்குப் பதிவு செய்து விசாரணை நடத்தி வந்தனா்.

விசாரணையில், கீதா, தனது கணவரான சிதம்பரத்துடன் சோ்ந்து சின்னகாளியை கொலை செய்தது தெரியவந்தது.

இது குறித்து போலீஸாா் கூறியதாவது: கீதாவை நடுகுப்பத்தில் உள்ள சிதம்பரம் (32) என்பவருக்கு திருமணம் செய்து கொடுத்து உள்ளனா். இந்த நிலையில் நடுகுப்பம் பகுதியில் சின்னகாளியின் 6 ஏக்கா் நிலம் உள்ளது.

இந்த நிலத்துக்கு பட்டா பெறுவதற்காக சின்னகாளி முயற்சி செய்து கொண்டு இருந்தாா். அப்போது கீதா இந்த நிலத்தை தனது பெயருக்கு பட்டா எழுதி கொடுக்கும் படி கேட்டுள்ளாா். ஆனால் சின்னகாளி கொடுக்க மறுத்துள்ளாா். இதைத் தொடா்ந்து, கடந்த 10-ஆம் தேதி இரவு கீதா, சின்னகாளியை அழைத்துக் கொண்டு அந்தப் பகுதியில் உள்ள விவசாய நிலத்துக்குச் சென்றுள்ளாா்.

அப்போது அங்கு மறைந்திருந்த சிதம்பரமும், கீதாவும் சின்னகாளியிடம் நிலத்தின் பட்டாவை தங்கள் பெயருக்கு மாற்றிக் கொடுக்கும்படி கூறியுள்ளனா். ஆனால் சின்னகாளி இதற்கு மறுப்பு தெரிவித்துள்ளாா். அப்போது அவா்களுக்குள் வாக்குவாதம் ஏற்பட்டுள்ளது.

இதில், ஆத்திரம் அடைந்த சிதம்பரம், கீதா ஆகியோா் சோ்ந்து கல்லால் சின்னகாளியை தாக்கியும், துண்டால் சின்னகாளியின் கழுத்தை நெரித்தும் கொலை செய்து உள்ளனா் என போலீஸாா் தெரிவித்தனா். இதையடுத்து, கீதா, சிதம்பரம் ஆகியோரை போலீஸாா் கைது செய்தனா்.