200 தொகுதிகளுக்கு மேல் திமுக கூட்டணி வெற்றி பெறும்: முதல்வா் மு.க.ஸ்டாலின்!

வரும் சட்டப்பேரவைத் தோ்தலில் 200 தொகுதிகளுக்கும் மேல் திமுக கூட்டணி வெற்றி பெறுவது நிச்சயம் என திமுக தலைவரும் முதல்வருமான மு.க.ஸ்டாலின் கூறினாா்.

திமுக சாா்பில் வடக்கு மண்டல வாக்குச்சாவடி குழு பயிற்சி மாநாடு ஜோலாா்பேட்டையை அடுத்த மண்டலவாடியில் சனிக்கிழமை நடைபெற்றது. மாநாட்டுக்கு தலைமை வகித்து முதல்வா் மு.க.ஸ்டாலின் பேசியதாவது:

தமிழ்நாட்டில் ஒவ்வொரு தொகுதியும் திமுகவின் கோட்டை என நிரூபிக்க வேண்டும். தமிழ்நாடு முழுவதும் 75,000 வாக்குச்சாவடிகள் உள்ளன. ஒவ்வொரு வாக்குச்சாவடியிலும் 350 வாக்குகள் வீதம் பெற வைக்க வேண்டும். 2.60 கோடி வாக்குகள் திமுகவுக்காக பெற இலக்கு நிா்ணயிக்கப்பட்டுள்ளது. 200 தொகுதிகளுக்கு மேல் வெற்றி பெறுவது நிச்சயம்.

வாக்காளா்களை தோ்தலுக்கு முன்னதாக ஐந்து முறையாவது சந்தித்து திராவிட மாடல் அரசின் திட்டங்களை மக்களுக்குத் தெரியப்படுத்த வேண்டும். இதுவரை திமுகவுக்கு வாக்கு அளிக்காதவா்களாக இருந்தாலும் அவா்களை நேரில் சந்தித்து வாக்கு சேகரிக்க வேண்டும்.

மகளிா் உரிமைத் தொகை பெறும் பயனாளிகளான 1.31 கோடி குடும்பத் தலைவிகளுக்கு முன்கூட்டியே ரூ. 5,000 வழங்கப்பட்டுள்ளதால் அவா்கள் மிகவும் மகிழ்ச்சி அடைந்துள்ளனா். தோ்தலைக் காரணம் காட்டி உரிமைத் தொகை வழங்குவதை நிறுத்தும் சதித் திட்டம் முறியடிக்கப்பட்டது மக்களுக்கு வியப்பாக இருந்தது; மக்களுக்கு எதிரானவா்களுக்கு அதிா்ச்சியாக இருந்தது.

பாஜக அரசு மக்களுக்கு நல்ல திட்டங்களைச் செய்ய மாட்டாா்கள். மற்றவா்களையும் செய்ய விடமாட்டாா்கள். தமிழகத்துக்கு சிறப்புத் திட்டம் எதையும் மத்திய பாஜக அரசு ஏன் அறிவிக்கவில்லையென கேட்ட கேள்விக்கு இதுவரை பிரதமா் பதிலளிக்கவில்லை.

சட்டம்- ஒழுங்கு குறித்துப் பேச அதிமுகவுக்கு தகுதியில்லை. விவசாயிகளுக்கு எதிரான வேளாண் சட்டங்கள், சிறுபான்மை மக்களுக்கு எதிரான சட்டங்கள் ஆகியவற்றுக்காக மத்திய அரசுக்கு ஆதரவு தெரிவித்தவா் எடப்பாடி பழனிசாமி.

பாஜகவின் டப்பா என்ஜின் முன்பு திராவிட மாடல் சூப்பா் ஃபாஸ்ட் என்ஜின் தலைகுனியாது. ஏராளமான சாதனைகளை ஐந்து ஆண்டுகளில் செய்திருக்கிறோம். திராவிட மாடல் 2.0 ஆட்சி அமைவதை இலக்காகக் கொண்டு பாடுபட வேண்டும்.

வேட்பாளா்கள் தோ்வு செய்வதை தலைமை பாா்த்துக் கொள்ளும். திமுக தலைமையிலான கூட்டணியை வெற்றி பெறச் செய்ய வேண்டியது உங்கள் கடமை என்றாா் முதல்வா் ஸ்டாலின்.

திமுக பொருளாளா் டி.ஆா்.பாலு, துணைப் பொதுச் செயலா் க.பொன்முடி, அமைச்சா் மு.பெ.சாமிநாதன் ஆகியோா் முன்னிலை வகித்தனா். பொதுப் பணி, நெடுஞ்சாலைத் துறை அமைச்சரும், வடக்கு மண்டலத் தோ்தல் பொறுப்பாளருமான எ.வ.வேலு வரவேற்றாா்.

அமைச்சா்கள் எம்.ஆா்.கே.பன்னீா்செல்வம், ராஜேந்திரன், ஆா்.காந்தி, சட்டப்பேரவை துணைத் தலைவா் கு.பிச்சாண்டி, எஸ்.ஜெகத்ரட்சகன் எம்.பி. ஆகியோா் வாழ்த்துரை வழங்கினா். எம்.பி.-க்கள் சி.என்.அண்ணாதுரை, டி.எம்.கதிா்ஆனந்த், எம்எல்ஏ-க்கள் அ.நல்லதம்பி, அ.செ.வில்வநாதன், ஏ.பி.நந்தகுமாா் மற்றும் எம்எல்ஏ-க்கள், கட்சி நிா்வாகிகள் கலந்து கொண்டனா். மாவட்டச் செயலரும் ஜோலாா்பேட்டை தொகுதி எம்எல்ஏ-வுமான க.தேவராஜி நன்றி கூறினாா்.