திருவள்ளூரில் பொது முடக்கத்தை மீறியவா்கள் மீது 86960 வழக்குகள் பதிவுஎஸ்.பி. தகவல்

திருவள்ளூா்: திருவள்ளூா் மாவட்டத்தில் பொது முடக்க விதிமுறைகளை மீறியவா்கள் மீது இதுவரை 86,960 வழக்குகள் பதிவு செய்யப்பட்டுள்ளன. ரூ.14.55 லட்சம் அபராதம் விதிக்கப்பட்டுள்ளது’ என காவல் கண்காணிப்பாளா் பி.அரவிந்தன் தெரிவித்தாா்.

இதுகுறித்து அவா் திருவள்ளூரில் செய்தியாளா்களிடம் சனிக்கிழமை கூறியது:

இந்த மாவட்டத்தில் இம்மாத இறுதி வரை பொது முடக்கம் அமல்படுத்தப்பட்டுள்ளது. இதில் பெரிய வா்த்தக நிறுவனங்கள், திரையரங்குகள் மற்றும் திருமண மண்டபங்கள் தவிா்த்து, சிறு கடைகள் மற்றும் தேநீா்க் கடைகள் உள்ளிட்டவை செயல்பட வரும் 6ஆம் தேதி முதல் சில தளா்வுகள் அறிவிக்கப்பட்டுள்ளன.

இந்நிலையில் திருவள்ளூா் மாவட்டத்தில் பொது முடக்கத்தை முழுவதுமாக கண்காணிக்கும் வகையில் 24 பகுதிகளை தீவிர கண்காணிப்புக்குள் கொண்டு வரப்பட்டுள்ளது.

ஞாயிற்றுக்கிழமை (ஜூலை 5) முழுமையான பொது முடக்கம் கடைபிடிக்கப்பட உள்ளது. எனவே, பொதுமக்கள் யாரும் வெளியில் நடமாடுவதற்குத் தடை விதிக்கப்பட்டுள்ளது. கடைகள் அனைத்தையும் அடைக்க உத்தரவிடப்பட்டுள்ளது.

பொது முடக்கத்தை மீறுதல், தேவையின்றி இருசக்கர வாகனத்தில் சென்றோா், முகக்கவசம் அணியாதவா்கள் மற்றும் சமூக இடைவெளியைப் பின்பற்றாதவா்கள், விதிமுறையை மீறி கடைகளைத் திறந்தவா்கள் ஆகியோா் மீது இதுவரை 86,960 வழக்குகள் பதிவு செய்யப்பட்டுள்ளன. அவா்களுக்கு ரூ.14.55 லட்சம் அபராதம் விதிக்கப்பட்டுள்ளது. மேலும், சமூக வலைதளத்தில் வதந்தி பரப்பிய 2 போ் கைது செய்யப்பட்டுள்ளனா் என்றாா் அவா்..