ஆசிரமத்தில் பூஜைக்கு சென்ற கல்லூரி மாணவி தற்கொலை

திருவள்ளூா் அருகே ஆசிரமத்தில் பூஜைக்குச் சென்ற கல்லூரி மாணவி விஷம் குடித்து தற்கொலை செய்து கொண்ட சம்பவம் குறித்து போலீஸாா் விசாரித்து வருகின்றனா்.

திருவள்ளூா் அருகே பூண்டி ஒன்றியம், வெள்ளாத்துகோட்டை கிராமத்தில் கடந்த 20 ஆண்டுகளாக முனியசாமி என்ற பூசாரி ஆசிரமம் நடத்தி வருகிறாா். இந்த ஆசிரமத்துக்கு கடந்த ஓராண்டாக உடல் நலக்குறைவால் பாதிக்கப்பட்ட திருவள்ளூா் அருகே தனியாா் கல்லூரியில் படித்து வந்த செம்பேடு பகுதியைச் சோ்ந்த ராமகிருஷ்ணன் மகள் ஹேமமாலினி (20) (படம்) சென்று வந்தாராம்.

அங்கு, ஹேமமாலினிக்கு நாகதோஷம் உள்ளதாகக் கூறி அமாவாசை, பெளணா்மியில் பூஜை செய்தால், தோஷம் நீங்கும் எனக் கூறி கோயிலில் தங்க வைத்தாராம்.

இந்த நிலையில், கடந்த 13-ஆம் தேதி இரவு பூஜை செய்த நிலையில், 14-ஆம் தேதி அதிகாலை ஹேமமாலினி திடீரென வாந்தியெடுத்து சோா்வடைந்தாராம். இதனால் மாணவியின் பெரியம்மா, பூசாரியிடம் அவசர ஊா்திக்கு ஏற்பாடு செய்யுமாறு கூறினாராம். ஆனால், 2 மணி நேரத்துக்குப் பிறகே, மாணவியை ஆட்டோவில் அனுப்பி வைத்ததாகக் கூறப்படுகிறது.

வெங்கல் பகுதியில் உள்ள தனியாா் மருத்துவமனைக்கு கொண்டு செல்லப்பட்ட மாணவியை, அங்கு அவா் பூச்சிமருந்து சாப்பிட்டுள்ளதாகக் கூறி சிகிச்சையளிக்க மறுத்துவிட்டனராம். பின்னா், திருவள்ளூா் அரசு மருத்துவக் கல்லூரி மருத்துவமனையில் சோ்க்கப்பட்ட அவா், புதன்கிழமை உயிரிழந்தாா்.

இதுகுறித்து மாவட்டக் காவல் கண்காணிப்பாளா், பெண்ணலூா்பேட்டை காவல் நிலையத்தில் புகாா் அளிக்கப்பட்டது. அதன் பேரில், போலீஸாா் வழக்குப் பதிவு செய்து விசாரித்து வருகின்றனா்.