விவசாயியிடம் வழிப்பறி: இளைஞர் கைது

திருவண்ணாமலை அருகே விவசாயியிடம் வழிப்பறி செய்த இளைஞரை போலீஸார் கைது செய்தனர்.

 திருவண்ணாமலையை அடுத்த நடுப்பட்டு கிராமத்தைச் சேர்ந்தவர் விவசாயி ஆறுமுகம் (55). இவர், வியாழக்கிழமை மாலை திருவண்ணாமலை அரசு மருத்துவக் கல்லூரி மருத்துவமனையில் சிகிச்சை பெற இரு சக்கர வாகனத்தில் சென்று கொண்டிருந்தார்.

பள்ளிகொண்டாப்பட்டு கூட்டுச் சாலை அருகே வந்தபோது அந்த வழியே இரு சக்கர வாகனத்தில் வந்த மர்ம நபர், ஆறுமுகத்தை வழிமறித்து கத்தியைக் காட்டி மிரட்டியுள்ளார். மேலும் ஆறுமுகத்திடம் இருந்த ஆயிரம் ரூபாயை பறித்துக் கொண்டு தப்பியுள்ளார்.

 இதுகுறித்து, திருவண்ணாமலை கிழக்கு காவல் நிலைய போலீஸார் வழக்குப் பதிந்து வழிப்பறியில் ஈடுபட்டதாக பள்ளிகொண்டாப்பட்டு கிராமத்தைச் சேர்ந்த தங்கவேலுவைக் (25) கைது செய்தனர்.