சரக்கு வாகனம் கவிழ்ந்து 13 பேர் காயம்

கீழ்பென்னாத்தூர் அருகே சரக்கு வாகனம் கவிழ்ந்ததில் 5 பெண்கள் உள்பட 13 பேர் பலத்த காயமடைந்தனர்.
விழுப்புரம் மாவட்டம், செஞ்சி வட்டம், சே.பேட்டை கிராமத்தைச் சேர்ந்த 20 பேர் சரக்கு வாகனத்தில் (டாடா ஏசி) வியாழக்கிழமை கீழ்பென்னாத்தூரை அடுத்த கானலாபாடி கிராமத்தில் நடைபெற்ற துக்க நிகழ்ச்சியில் கலந்து கொள்ள வந்தனர்.
துக்க நிகழ்ச்சி முடிந்து மீண்டும் சே.பேட்டைக்கு திரும்பினர். கீழ்பென்னாத்தூரை அடுத்த நாரியமங்கலம் கூட்டுச்சாலை பகுதியில் சென்றபோது எதிர்பாராதவிதமாக சாலையோரம் இருந்த விவசாய நிலத்தில் சரக்கு வாகனம் கவிழ்ந்து விபத்துக்குள்ளானது.
இந்த விபத்தில் சரக்கு வாகனத்தில் பயணம் செய்த சே.பேட்டை கிராமத்தைச் சேர்ந்த இந்திரா (25), ஆனந்தன் (35), முனுசாமி (65), அஞ்சலை (35), முத்துக்கிருஷ்ணன் (62), முனியன் (60), சசி (32), ஜோதி (36), சேட்டு (70), மற்றொரு அஞ்சலை (46), ஜெயாமல்லி (70), ராஜமாணிக்கம் (52), ஓட்டுநர் ஏழுமலை (35) ஆகியோர் பலத்த காயமடைந்தனர்.
இவர்களை பொதுமக்கள் மீட்டு, திருவண்ணாமலை அரசு மருத்துவக் கல்லூரி மருத்துவமனைக்கு அனுப்பி வைத்தனர். இதுகுறித்து கீழ்பென்னாத்தூர் போலீஸார் வழக்குப் பதிந்து விசாரித்து 
வருகின்றனர்.