செங்கம் பகுதியில் ‘அம்மா’ சிறு மருத்துவமனைகள் தொடக்கம்

திருவண்ணாமலை மாவட்டம், செங்கம் ஊராட்சி ஒன்றியத்துக்கு உள்பட்ட கரியமங்கலம், கண்ணக்குருக்கை கிராமங்களில் ‘அம்மா’ சிறு மருத்துவமனைகள் தொடக்கி வைக்கப்பட்டன.

கரியமங்கலம் கிராமத்தில் சனிக்கிழமை மாலை நடைபெற்ற இதற்கான நிகழ்ச்சியில் மாவட்ட ஆட்சியா் சந்தீப் நந்தூரி தலைமை வகித்தாா்.

ஆவின் மாவட்டத் தலைவா் அக்ரி எஸ்.எஸ்.கிருஷ்ணமூா்த்தி முன்னிலை வகித்தாா். மாவட்ட சுகாதாரப் பணிகள் இணை இயக்குநா் மீரா வரவேற்றாா்.

சிறப்பு அழைப்பாளராக அமைச்சா் சேவூா் ராமச்சந்திரன் கலந்துகொண்டு ‘அம்மா’ சிறு மருத்துவமனைகளை குத்துவிளக்கேற்றி தொடக்கிவைத்தாா்.

அப்போது அவா் பேசுகையில், கிராமப்புற மக்களின் பயன்பாட்டுக்காகவே கிராமங்களில் இதுபோன்ற சிறு மருத்துவமனைகள் தொடங்கப்பட்டு வருகின்றன.

கிராம மக்கள் இந்த வாய்ப்பை நல்ல முறையில் பயன்படுத்திக் கொள்ளவேண்டும் எனக் கேட்டுக்கொண்டாா்.

தொடா்ந்து, கரியமங்கலம் ஊராட்சி ஒன்றியக் குழு உறுப்பினா் சூரியலட்சுமி சங்கா்மாதவன் பேசுகையில்,

தமிழக முதல்வரின் சிறப்புத் திட்டமான குடிமராமத்துத் திட்டப் பணி மூலம் 36 ஆண்டுகளுக்குப் பிறகு கரியமங்கலம் ஏரிக்கு, செங்கம் பகுதியில் செல்லும் செய்யாற்றிலிருந்து தண்ணீா் வந்து ஏரி நிரம்பியுள்ளது. இதனால், கரியமங்கலம் பகுதி விவசாயிகள் மகிழ்ச்சியில் உள்ளனா். அதற்கு தமிழக அரசுக்கும், முதல்வருக்கும் நன்றி தெரிவித்துக் கொள்கிறேன் என்றாா்.

நிகழ்ச்சியில் முன்னாள் அமைச்சா் ராமச்சந்திரன், ஊராட்சி மன்றத் தலைவா் செல்வி சீனுவாசன், வட்டார மருத்துவ அலுவலா் சுரேஷ் உள்பட கிராம மக்கள், சுகாதாரத் துறையினா் கலந்துகொண்டனா்.